Tempotimor (Lequidoe)-Ministru Asuntu Parlamentár no Komunikasaun Sosiál (MAPKomS), Francisco Martins Jerónimo hatete, komunidade sira iha suku Betulau, Postu Administrativu Lekidoe, Munisípiu Aileu, iha dever moral atu luta hasoru pandemia Covid-19
"Husu ba populasaun iha territóriu tomak, liliu iha suku Betulau ne'e, ida-ida tenke iha devér morál atubele kombate moras refere, voluntáriamente liuhusi vizita sentru vasina ne’ebé estabelese ona hodi bele simu vasina nune’e bele proteje ita-nia saúde nu’udar kontribuisaun ba bein stár povu nia ba protesaun saúde nasionál”, dehan Ministru Francisco Martins bainhira hala'o Kampaña nasionál vasinasaun Covid-19 iha suku Betulau, sábadu (09/10).
Tanba daudaun ne'e, membru Governu, deputadu sira mós iha konsiénsia hodi tun hamutuk ba ko’alia ho povu sira, tanba sira hatene katak vasina nu’udar meius importante tebes hodi fó protesaun ba ema nia saúde.
Nune’e populasaun sira bele halo prevensaun ho di’ak atu garante serbisu ho avontade, iha sirkulasaun livre, halo atividade ekonómika ho di’ak, importante mak nafatin uza máskara no fase liman babeik.
Estadu hakarak povu moris ho kondisaun ida saudável, tanba ne’e ba inan-aman sira ne’ebé mak ho idade 60 ba leten, presiza simu vasina atubele aumenta sira-nia imunidade
Tanba sira-nia idade hahú fraku, no nu’udar alvu importante mós iha programa vasina, nune’e bele iha forsa atu kontra moras oioin.
Marka prezensa iha kampaña ne’e, Administradór Munisípiu Aileu, Administradór Postu Lekidoe Diretór DNDI-MAPKOMS, Rev. Amu Paroku Parokia Lekidoe, Diretór Saúde Munisípiu Aileu, Komandante Eskuadra Postu Lekidoe, líder komunitáriu, pesoál saúde nomós komunidade sira. (*)
