"Kompromisu ne’ebé ohin ita asina, hakarak halo no hadi’a liután iha tinan 5 (lima) oin mai, besik ba ema sira ne’ebé iha risku boot liu, ema infetada ka inkapasitada sira ba moras ne’e, ho serbisu, esforsu, apoiu maka’as liu no asisténsia ida di’ak liu, ho investimentu no solidariedade boot liu, ne’ebé aloka ba prioridade importante Saúde Públika nian”, dehan PM Taur Matan Ruak, iha salaun City 8  Hás Laran, kinta (30/09).

Tanba Tuberkuloze ne'e, risku ida ne’ebé afeta ema kuaze 508, iha kada abitante 100.000 iha Timor-Leste, ne’ebé reprezenta taxa insidénsia boot liu daruak iha rejiaun Sudeste Aziátiku no ida ne’ebé mak aas liu iha Mundu tomak.

"Ita la kontente ho númeru sira ne’e, ita mós nunka konforma ho rezultadu ne’ebé ita hetan iha tinan hirak ikus ne’e. Iha sentidu ida-ne’e nu’udár Xefe Governu, ohin ita renova ita-nia komprimisu ne’ebé mak la hatene kole hodi halakon  tuberkuloze , no komprimisu ida ne’ebé apela ba ita-nia partisipasaun iha divulgasaun no sensibilizasaun ba sidadaun sira ba identifikasaun kazu foun sira”, dehan nia.

PM ho liafuan ida ne’ebé insentivu no enkorajamentu ba sira hotu ne’ebé mak loroloron serbisu ho família no sira ne’ebé mak vítima ba Tuberkuloze iha Timor-Leste.

"Ami konta ho imi-nia esforsu, empeñu no dedikasaun, atu hamutuk, ita bele hapara Tuberkuloze ba Timoroan sira-nia moris, ba Timor-Leste ida livre husi Tuberkuloze, ba Nasaun ida ho sidadaun saudável no bele dezenvolve ninia potensiál”, afirma nia.

Reprezentante OMS, Arvind Mathur, haksolok tebes ho komprimisu ne'e hodi sai testemuña ba okaziaun importánte ida ne'e hodi kongratula Governu Timor-Leste.

"Onra boot mai ha’u no kontente tebes sai testemuña ba okaziaun importante ida ne’e, ha’u hakarak kongratula Sua Eselensia Primeiru Ministru Senhor, Taur Matan Ruak, Sua Eselensia Ministra Saude, Odete Maria Freitas Belo no nia ekipa hotu, ba pesoál saúde liña frente sira hotu, voluntáriu no povu Timor-Leste ba kompromisu hodi hapara moras TBC”, dehan nia. (*)