Maibé Bankada Frente Revolusionáriu Timor-Leste no Independente (FRETILIN) iha Parlamentu Nasionál (PN)lakohi Partidu Polítiku (ParPol) sira atu politiza pandemia Covid-19 ne'ebé oras ne'e afeta nasaun hotu iha mundu inklui mós Timor-Leste.
Rezultadu votusaun nominal ba pedidu renovasaun Estadu Emerjénsia ne'e, totál votu a-favór 39, kontra 0 no abstensaun 8, nune'e EE ba dala-18 ne'e sei aplika hahú iha loron 30 setembru 2021 to'o iha loron 29 outubru 2021.
Hafoin finaliza aprovasaun, Prezidente PN Aniceto Longuinhos Guterres Lopes, husu Governu hasa’e kobertura no programa vasinasaun nian no husu mókomunidade presiza kolabora ho parte saúde tanba imunidade mak bele salva ema husi surtu Covid-19.
“Nune’e Lei autorizasaun renovasaun Estadu Emerjénsia aprovadu. espera Governu implementa ho di’ak”, deklara Aniceto hafoin taka ajenda debate Pedidu Estadu Emerjensia ba dala-18 iha plenária PN, tersa (28/09).
Xefe bankada FRETILIN, Francisco Miranda Branco, lakohi Partidu Polítiku (ParPol) labele politiza kestaun pandemia covid-19.
"Ba ita politiku sira ami hanoin, para ona ho ita-nia politika sira de politizasaun ba kestaun de saúde públika pandemia de Covid-19. Nomós apela ba ita polítiku sira labele politiza kestaun saúde públika pandemia mundial ne'ebe afeta mós Timor-Leste”, dehan nia.
Tanba, ho atetude politizasaun ba Covid-19 ne'ebé hatudu Politiku sira, konsege muda mentalidade populasun no ohin lorom pasiénte barak la ba ona sentru saúde no klínika inklui ospitál sira.
"Hanesan konfirmasaun ohin, ita rona husi SIJK, depois saida mak akontese tanba ida ne'e konsikuénsia ba ita-nia sidadaun sira ne'ebé lakoi hakbesik ba sentru saúde, klínika no ospitál sira, e sira mate, tanba ita-nia konportamentu infanti, hodi hasoru pandemia boot ida Covid-19”, afirma nia.
Deputadu Bankada PLP, Noé da Silva Ximenes “Buka-Tuir, husu nafatin ba Governu atu proteze saúde públika ba populasaun husi pandemia Covid-19 nomoa presiza implementa medida rigorozu durante aplikasaun Estadu Emerjénsia dala-18.
“Bankada PLP husu nafatin ba Governu atu fó nafatin protesaun saúde públika ba populasaun, ne’ebé nu’udar aktu prevensaun hasoru Covid-19 no presiza implementa medida ho rigorozu durante períodu Estadu Emerjénsia ne’e, liliu iha pontu entrada sira entre Timor-Lese ho Indonézia”, informa nia.
Husu atu nafatin tau atensaun ba ekipa liña frente sira ne'ebé halo servisu no hasoru dezafiu nune’e bele hala’o serbisu ho di’ak.
Pozisaun Governu hodi hato'o proposta ba Prezidente Repúblika husu autorizasaun ba Parlamentu Nasionál tanba situasaun Covid-19 iha Timor-Leste kazu ativu konfirmadu hamutuk 994 husi totál 19.382 dezde inísiu rejistrasaun kazu no ema na’in-113 mak mate ho Covid-19.
Aleinde mós dadus mundiál ne’ebé anunsia husi Organizasaun Mundiál Saúde (OMS) rejista 232.000.000 kazu konfirmadu infesaun covid-19 no ema na’in-4.760.000 mate asosiada ho Covid-19.
Tanba ne'e, Prezidente Repúblika, Francisco Guterres ‘Lú Olo’, propoin ba Parlamentu Nasionál atu halo estensaun Estadu Emerjénsia ba loron 30 tán iha territóriu nasionál ho parsialmente suspende sirkulasaun internasionál, liberdade sirkulasaun, direitu reuniaun no manifestasaun, liberdade kultu (culto) inklui limita no proibisaun realizasaun selebrasaun relijioza.
Nune’e mós direitu ba edukasaun inklui halo suspensaun temporária ba prosesu no atividade ensinu aprendizajen ho rejime prezensiál, direitu propriedade no inisiativa ekonómika privada, nomós direitu rezisténsia sira sei impede husi autoridade públika bainhira sidadaun sira la kumpre medida ezekusaun. (*)
