"Objetivu treinamentu ne'e hanesan treinamentu klínika ne'ebé Ospitál Nasionál mak organiza atubele hasa'e nível prontidaun hasa'e fasilidades no ICU (intensive Care Unit) ligadu ho tratamentu Covid-19 ninian tanba importante iha situasaun agora atubele eleva kapasidade ita nia médiku sira-nian tanba situasaun moras pandemia ida ne'e nesesita duni médiku sira-nia skill hodi halo tratamentu ne'ebé di'ak ba pasiénte sira atubele redúz mortalidade nomós fasilidade iha izolamentu sira nomós ICU", dehan Mercelo Amaral iha Meeting Room HNGV, segunda (27/09).

Nune'e, kontinua fó refreasing ba médiku sira atu nune'e atende pasiénte sira iha Sala Izolamentu no klínika sira.

"Ospital ne'e responsabilidade másimu ne'ebé jere rekursu ba fatin Izolamentu Vera Cruz no Lahane iha momentu ida ne'e ita presiza halo refreasing training hodi refresh nafatin sira-nia hanoin oinsá atu atende pasiénte sira", dehan nia.

Husi treinamentu ne'e oinsá atu eleva kapasidade médiku sira atubele detekta sedu moras sira seluk inklui mós Covid-19 molok tama ba situasaun gravé, inklui mós oinsá uza oxijéniu terapia ba moras Covid-19.

Tarjetu treinamentu ida ne'e foku liuba médiku sira inklui mós ba médiku foun sira, nomós ba médiku espesialista sira ne'ebé mak envolve iha Ospital Nasionál Guidu Valadares nomós iha sala Izolamentu Vera Cruz no Lahane. (*)