Embaixadór Uniaun Europeia iha Timor-Leste, Andrew Jacobs hatete, nutrisaun kleur ona mak sai apoiu prinsipál husi UE ba Timor-Leste. Liuhusi “Parseria ba Melloramentu Nutrisaun iha Timor-Leste.
"UE apoia finanseira no téknikamente Ministériu Saúde iha implementasaun Estratéjia Nasionál ba Nutrisaun ho objetivu atu hametin servisu kuidadu saúde primaria no nutrisaun ba populasaun. Atu kompletamenta apoiu orsamentál, UE envolve UNICEF ho millaun EUR 4,8 (millaun USD 5,6)", dehan nia iha palásiu Sinza, Kaikoli, kinta (23/09).
Hodi apoiu tékniku ba Ministériu Saúde, no Ministériu sira seluk ne‘ebé envolve, hodi hadi’a servisu nutrisaun ne‘ebé foka ba prevensaun no jestaun má-nutrisaun no moras komún, diversifikasaun dieta nian, no mudansa hahalok no prátika fó susubeen inan nian.
Ministra Saude, Odete Maria Freitas Belo hatutan, UE Prontu apoiu Timor-Leste liliu iha área nutrisaun nian, altura ne'eba ko’alia tiha ona enkontru iha nível aas, ne'ebé lidera husi Ministeriu Negósiu Estranjeiru no Kooperasaun (MNEK) no enkontru ne'e halo kada tinan.
"Kuandu orsamentu aloka ona mai Timor, espesialmente ba MS tanba ita liga ba asuntu nutrisaun nian, entaun enkontru ida hansan ohin ne'e ita halo kada tinan, enkontru ne'e ita hakrak halo revizaun ba atividade sira ne'ebé mak ita halo ona", dehan Odete.
Tanba, nutrisaun importante no partikularmente importante ba labarik sira tanba labarik nia direitu atu sobrevive, no sai isin di’ak no forte.
Ho labarik sira ne'ebé ho kondisaun nutrisaun di'ak sa’e ba adultu saudável sira ne'ebé sei kontribui ba dezenvolvimentu sósio-ekonómiku nasaun nian. (*)