Maibé Deputadu CNRT, Domingos de Carvalho deklara, nia parte preokupa ho povu ne’ebé komesa lakon konfiansa ba servisu Hospital Nasional Guidu Valadares (HNGV).
"Ha’u mós, vítima covid-19, ami iha uma laran, ami na'in-sanolu (10) kona hotu kedas, ami halo auto-kuarentena loron 14, e ami tama tan loron-16”, dehan deputadu Adriano iha plenária Parlamentu Nasionál (PN), segunda (20/09).
Dadauk Deputadu Adriano simu ona vasina dala-rua maibé nafatin infetadu ba covid-19 tanba vasina ne'e la'ós ai-moruk atu kura pandemia.
"Ha’u vasina dala-rua ona kompletu, maibé kona nafatin tanba vasina la'ós ai-moruk, matenek sira seidauk hetan ai-moruk atu kura, maibé tanba vasina ne'e mak ajuda ha’u hodi bele augente”, dehan nia.
Moras Covid-19 ne'e ninia sintoma, inus-ben no isin manas babain, maibé iha kakorok ne'e hanesan ikan ruin sona, no mear ba mear mós la sai, nomós halo ulu-fatuk moras, no isin lolon sira ne'e kole, inklui té bén.
Tanba ne'e PD fiar Covid-19 iha Timor-Leste ejiste, no husu atu hapara ona ho deklarasaun polítika dehan Covid-19 laiha, tanba buat ne'e la'ós akontese iha Timor-Leste de'it maibé akontese iha mundu.
"E agora dadauk ita deskontrola ona iha Timor-Leste”, hatete nia.
Husu mós ba Governu atu halo investigasaun klean ema sira ne'ebé mak mate iha Postu Administrativu Kelikai Munisípiu Baukau, nomós Fohorem, Suai.
"Ema sira mate naban-naban, ferik katuas ho idade, 60, 70 mate naban-naban, tanba mear dada iis la di’ak, Covid ne'e ninia sintomas ida mak ita dada iis ne'e la di’ak, ita toba ita-nia iis atu kotu”, afirma nia.
Tanba, durante infeksaun Covid-19 deputadu PD koko dadas iis maibé la di’ak no tur mós la di’ak, toba mós la di’ak, no hamriik mós atu monu.
"Ne'ebe husu ba komunidade lalika fiar ami politiku sira dehan Covid laiha, lalika mós fiar ami politika sira ne’ebé dehan lalika ba sona (vaksin), ai-moruk seidauk iha di'ak liu sona”, hatete nia.
Deputadu CNRT, Domingos de Carvalho, deklara, nia parte preokupa ho povu ne'ebe komesa lakon konfiansa ba servisu Hospital Nasional Guidu Valadares (HNGV).
"Ita haree buat ida Covid ne'e, deputadu adriano ko’alia, ha’u la saida maibé ha’u buat ida Covid ne'e ita haree iha ospitál ne'e halo ita-nia sidadaun hotu trauma, lakohi atu ba ne'eba, to'o agora ita haree sala sira ne’ebé ema toba ninia to'o agora mamuk barak, e depois mate ne'e aumenta barak liután”, dehan nia.
Tanba kada loron mate ne'e aumenta, maibé mate ne'e mate iha ema nia uma la'ós mate iha Hospital Nasional Guidu Valadares, ne'e lae.
"Tanba ema atu ba konsulta, tauk, ba ne'eba orsida pozitivu, e nia rasik husu infermeiru no doutor ruma ga pasa reseita ba nia hola ai-moruk iha apotik sira, e depois kuandu la halo tratamentu laloos ba ninia-an, mak nia soe nia isin”, afirma nia.
Bankada CNRT konsidera kauza ida ne'e faktu ida ne’ebé mak loos, tanba ema mate agora barak maibé ospitál ema menus, nune'e halo ema dúvida. (*)