"Ohin loron mundu mate barak tanba pandemia Covid-19, nune'e prezensa MAPKomS iha Aileu atu fó garantia katak vasina ne’ebé oras ne’e la’o iha teritóriu tomak seguru tebes, tanba ne'e husu ba komunidade sira atu konsiente katak vasina ne'e di'ak ba ita-boot sira hodi hasa’e imunidade kontra pandemia Covid-19”, dehan Francisco Martins, iha Suku Madabenu, kinta (16/09).
Governu iha nia intensaun hakarak proteze povu no sidadaun ida-idak iha Aldeia, Suku, Postu, Munisípiu to’o nível nasionál, ikus mai bele hetan imunidade Nasionál.
Tanba ne'e ho Kampaña nasionál ida ne'e oinsá atu Sensibiliza informasaun ba komunidade hodi konsensializa komunidade suku Madabenu tomak atubele simu vasina.
Xefe Suku Madabenu, Afonso M.Henrique hatete, nia parte kontente ho prezensa MAPKomS nia, tanba durante ne'e povu konsumu liu informasaun falsa entaun susar atu koopera ho autóridade lokál hodi simu vasina, maibé ohin loron komunidade rasik koopera no prontu atu simu vasina bainhira rona informasaun klaru husi Governu.
"Ami orgullu tanba MAPKomS tun direta mai ami-nia suku, hodi esplika ba komunidade sira no komunidade sira rasik tau konfiansa katak sira sei koopera ho líder sira atu simu vasina”, dehan nia.
Administrador Munisípiu Aileu, Abel da Conceição, agradese ba MAPKomS nia prezensa, taba fó ona tempu hodi partilla informasaun no hanoin balun hodi konsensializa komunidade sira atu simu vasina hodi luta hasoru pandemia Covid-19.
"Agradese wain tebes ba ita-boot nia prezensa, tanba bele hakat mai to’o iha ami-nia suku sira hodi fó informasaun lolos ba komunidade sira atu sira bele hakbesik-an ba simu vasina”, haktenik nia.
Partisipa iha atividade kampaña Nasionál ne’e, Administradór Munisípiu Aileu, Administradór Postu Laulara, Komandante PNTL Postu Laulara, Diretór DNDI, Vise Prezidente Tatoli, Diretór Saúde Munisípiu Aileu, reprezentante Diretór Saúde Nasionál, Líder Komunitáriu no komunidade sira. (*)