"Ami orgullu no apresia tebes ho prezensa MAPKomS nia ne'ebé mai Sensibiliza informasaun kona-ba programa vasinasaun Covid-19 ne'e, tanba ne'e ami komunidade Madabenu sei prontu atu koopera ho Governu hodi simu vasina”, dehan Xefe Suku Medabenu Afonso M.Henrique, iha Suku Madebenu, kinta (16/09).
Durante ne'e komunidade la koopera atu simu vasina tanba maioria rona informasaun falsa husi mídia sosiál, maibé prezensa Ministru Asuntu Parlamentar no Komunikasaun Sosiál (MAKomS), Francisco Martins Jerónimo iha sira-nia suku bele fó informasaun kona-ba vantazen husi vasina refere.
Reprezentante Komunidade, Teresa C.Perreira hatete, nia parte prontu atu simu vasina tanba rona ona informasaun direita ho klaramente husi Governu, no durante ne'e nia la simu vasina tanba tauk ho informasaun balun ne'ebé nia rona katak simu vasina vida badak.
"Durante ne'e ha'u la vasina tanba rona informasaun barak liu katak, vasina ita-nia vida badak, maibé ohin ha'u rona ona informasaun entaun ha'u sei prontu atu simu vasina”, dehan nia.
MAPKomS, Francisco Martins Jerónimo esplika, dalan úniku atu proteje-an mak, komunidade iha dever no obrigasaun atu koopera ho Governu hakbesik-an ba postu saúde hodi simu vasina, nune'e hasa’e imunidade hodi forte hasoru Covid-19.
"Tanba estadu iha nia programa hodi halo preparasaun oinsá atu salva Komunidade, nune'e husu ba ita-boot sira nafatin koopera ho estadu hodi hakbesik-an ba simu vasina, nune'e ita bele salva ita-nia família, no ita-nia nasaun”, afirna nia. (*)