"Orsamentu ne'ebé ohin ita-boot sira haree, sira hakarak atu haree liuba oinsá atubele haforsa uza meus organizasaun nian, atubele hala'o ita-nia servisu hatan ba Covid-19 tanba ita la hatene Covid-19 ne'e atu homutuk ho ita ne'e to'o bainhira", dehan nia iha Palásiu Sinzas, Kaikoli, segunda (13/09).
Apoiu husi EUA ne'ebé liuhusi embaxada ne'e hanesan apoiu tutan, tanba iha tinan primeiru Timor-Leste hasoru pandemia ne'e iha ona apoiu lubuk ida husi sira, hanesan hadi'a infraestrutura sira no liliu ba fatin ICU iha ospitál Baukau.
EUA mós sei apoiu kona-ba vasina nian, maibé Ministériu Saúde seidauk hatene vasina dozes hira maibé vasina ne'e mak Pfizer.
"Vasina ne'e sei oferese ba ema ho idade 18 ba kraik to'o iha idade 12, ida ne'e sira (EUA) promete hela maibé seidauk hatene, dehan atu fó bainhira tanba aseidauk iha informasaun klaru", informa nia.
Enkaregadu Negósiu, Embaxadór Estadus Unidus Amérika (EUA), Tom Daley hatete, apoiu ida ne'e konta mós ho parte husi millaun 4 ne'ebé Governu Estadu Unidu fornese liuhusi inisiativa Covax hodi oferese vasina ba pais sira iha mundu tomak.
Nune'e Estadus Unidus Amerika sente orgullu tebes halo parseria ho Governu Timor-Leste hodi kombate Covid-19 no Timor-Leste nia númeru vasinasaun aas liu kompara ho nasaun sira seluk, maibé ida ne'e lá'ós to'o de'it iha ne'e, Timor-Leste presiza atu hasa'e tan númeru vasinasaun.
"Osan millaun 1 ne'ebé ohin ami fó ba Timor-Leste, nia objetivu atu ajuda no oferese informasaun ba ema sira ne'ebé sei duvida kona-ba atu simu vasina", esplika nia. (*)
