Tanba informa ne'ebé rejista iha ema adultu na'in-14 ne’ebé mate iha semana kotuk (16-22 agostu), la simu vasina kompletu (iha ema ida de'it mak simu doze vasina ida).
"Ida ne’e hatudu katak iha Timor-Leste ema ne’ebé mak simu ona vasina kompletu, seidauk iha ida mak mate ho/tanba Covid-19", hatete Koordenadór Forsa-Tarefa ba Prevensaun no Minitigasaun Surtu Covid-19 iha Timor-Leste, Rui Maria de Araújo, liuhusi komunikadu, kinta (26/08).
Nune'e mós iha semana kotuk (16-22 agostu), ema ne’ebé baixa iha Vera Cruz no Lahane tanba Covid-19, hamutuk hotu 41/54 (76%) mak seidauk simu vasina, kompara ho ema na'in 11/54 (20,3%) ne’ebé mak simu ona vasina kompletu.
"Ema ne’ebé seidauk simu vasina iha probabilidade boot liu dala-rua, atu baixa iha ospitál, kompara ho ema ne’ebé mak simu ona vasina", dehan nia.
Tuir dadus jerál iha Timor-Leste, loron 26 fulan-agustu kazu foun ne’ebé relata iha 307 (Díli 243, Baukau 30 no Munisípiu seluk 34). Husi kazu detetadu foun iha 114 (37%) iha ona vasina kompletu no 21 (7%) hetan ona vasina doze dahuluk
Iha mós kazu rekuperadu foun hamutuk 152, ativu 4.203, Komulativu kazu konfirmadu 15.603 no kazu mate/óbitu ne’ebé relata iha loron 26 agostu 2021 na'in-4. Tanba totál Óbitu iha Timor-Leste, loron 26 fulan-agustu hamutuk 56. (*)