Pesoál na’in-2 ne’ebé pozitivu teste Swab iha loron segunda (28/08) iha Palásiu Prezidente ho rejultadu fó sai pozitivu Covid-19.
Jornalista mídia imprime ho inisial CV hatete, rejultadu swab ne'ebé mak halo iha palásiu ne'e obrigatóriu tenke tuir tanba ne'e mak nia mós Swab.
"Ha'u la menta tanba jornalista ne'ebé mak viajen ba munisípiu Same no Ainaro balun la Swab no ha'u ne'ebé mak la ba Swab fali", dehan nia liuhusi telemovel, kinta (28/08).
Iha momentu ne'ebá nia halo teste swab tanba nia hanesan jornalista destekadu iha PR, bainhira hetan ajenda husi grupu PR katak iha ajenda reuniaun Konsellu Seguransa no Defeza ho Konsellu Estadu.
"Entaun ha'u mós ba PR, to'o iha ne'ebá seguransa sira dehan atu tama ba laran tenke tuir teste swab tanba ne'e ha'u Swab", hatete nia.
Maibé nia laiha sintomas ruma hanesan inus metin, mear ka isin manas ruma.
"Ha'u-nia kondisaun durante ne'e di'ak hela, no durante ne'e ha'u mós la sai ba munisípiu ruma, tanba ha'u durante ne'e destakadu de'it iha palásiu prezidensiál nomós sosiedade sivíl, depois ha'u iha uma mós kos, ha'u laiha kontaktu ho ema seluk." dehan nia.
Jornalista Mídia Online ho inisial JMBSS hatete, to'o agora kondisaun di'ak hela hanesan babain laiha moras ida.
"Ha'u-nia kondisaun durante ne'e ha'u sente di'ak hela no estavel hela no ha'u nunka iha gejala ruma atu mear ka isin manas ulun moras maibé ho rezultadu teste swab obrigatóriu ne'e mak ha'u pozitivu fali mai e ha'u-nia kondisaun saude di'ak hela", reafirma nia.
Momentu halo teste swab iha loron segunda no rezultadu sira fó sai iha kuarta ne'e maibé iha kuarta parte husi médiku sira seidauk foti no ohin kinta (26/08) mak husi Palásiu Prezidensial nia telemovel atu ba kuarentena no oras ne'e dadaun iha hela kuarentena Fatuhada hodi halo Izolamentu.
Molok ne'e, Xefe Casa Sivíl Prezidende Repúblika, Francisco Maria De Vasconcelos hatete, Palásiu halo teste Swab ba funsionáriu sira iha Palásiu Prezidensial tanba iha loron hirak liuba halo viajen ba munisípiu rua, Same no Ainaro no fila iha funsionáriu balun posetivu no atu prevene labele da'et ba ema tenke realiza teste Swab ba funsionáriu sira. (*)
