Psikososiál klínika, Idalina Bores hatete, objetivu husi formasaun ida ne'e atu kapasita, orienta abilidade psikososiál bázika no primeru sokoru psikoloziku ba profisinál saúde liña frente sira ne'ebé dadaun hasoru hela situasaun dilemátiku surtu covid-19.

"Profisionál Saúde iha liña frente ne'ebé mak ohin mai tuir formasaun orientasaun kona-ba abilidade psikososiál bázika ne'e hamutuk ema na'in-45, maibé pesoál saúde barak mak la mai partisipa tanba hetan hotu pozitivu Cocid-19", dehan nia iha Salaun Novu Turizmu, Lisidere, tersa (24/08).

Pesoál saúde ne'ebé servisu iha liña frente sira hotu merese atu hetan formasaun ida ne'e, antes fó tulun ba ema seluk.

"Ohin ko'alia kona-ba abilidade oinsá atu ajuda kuda abilidade bázika psikososiál ba pesoál saúde atu fó tulun ba sira-nia an hodi fó tulun ba ema seluk", hatete nia.

Tanba profisionál saúde iha liña frente sira hanesan atan, maibé sai atan ida ne'ebé mak profisionál oinsá mak prepara nia-an hasoru funu ne'e.

"Tanba loron ba loron ita sente buat ne'e todan liu, entaun liuhusi formasaun pisikoloziku ida ne'e, ita-nia profisionál saúde sira fó importánsia kuidadu sira-nia an tuir emosaun ne'ebé mak iha", dehan nia.

Prezidente Cruz Vermella Timor-Leste (CVTL), Madalena Hamjan hatete, informasaun ne'e importante tebes tanba dalaruma ema hanoin de'it Covid maibé problema psikososiál domina hela ema ida la interese.

Maibé iha momentu Covid, psikososiál ne'e importante atu halo ema ne'e fiar oinsá hodi adaptasaun ho situasaun ida ne'ebé difísil.

"Rekursu Umanu ba atendementu moras mentál, ha'u sente sei todan los tanba ita tenke haree kondisaun fíziku ho kondisaun mentál ne'e hanesan balansu ida taun rekursu umanu mós tenke preparadu tanba moras ne'e la haketak ida, tanba ne'e husu Governu nia polítika tenke di'ak atubele abranza", reafirma nia. (*)