"Husi totál staff ne'ebé ke mós hetan pozitivu, hamutuk 116. Staff Ospitál Guido Valadáres ne'ebé pozitivu Covid, 116. Husi númeru sira ne'e, maioria emfeirnu, emfermeira hamutuk 53, médiku 26. Ida seluk ne'e, iha parteira, farmásia, lojístika, kliner, tékniku ad, oxijéniu, balu mós husi São João de Deus, nomós balu husi administrasaun nian", informa Diretór Ezekutiva HNGV, Alito Soares, iha kna'ar fatin HNGV, Bidau, tersa (24/08).

Husi funsionáriu na'in-116 ne'e, balu oras ne'e iha ona kuarantena, balu autu-izolamentu iha uma, no sira hotu iha kondisaun ne'ebé di'ak, la presiza apoiu oxijéniu, maske pozitivu covid19, maibé kondisaun jerál sei estável.

"Maibé, ami-nia staff sira ne'ebé iha Ospitál ne'e, maioria sira vasina hotu. Mais atu klean liu, filafali ba hirak ne'ebé pozitivu, vasina ka la'e, presiza haree dadus ida ne'e. Sira vasina karik, doze ida primeiru ka, doze ida kompletu, presiza haree ida ne'e. Ne'ebé ha'u lakohi halo asumse, hakarak hatete de'it, staff ne'ebé pozitivu mak 116, hirak ne'e vasina karik, primeir doze deit ka, ida ne'ebé", dehan nia.

Situasaun kona-ba funsionáriu sira-nia pozitivu Covid-19 ne'e, implika mós ba serbisu atu halo atendimentu saúde pasiénte sira nian, tanba médiku no emfermeiru sira barak labele tama serbisu hodi izola de'it-an iha kuarantena sira.

"Loos, implika. Implika ida ne'e afeta tebes. 116 mak afeta, ne'e ita-boot sira hatene, médiku 26, emfermeiru 53. Tanba afeta atendimentu númeru sira ne'e mak konsellu nia hanoin, hamutuk ho ekipa hotu, para halo rekrutamentu. Ita tenkeser apoiu, e la'ós konsellu, husu ba nasionál atu apoiu hodi bele responde ba nesesidade sira ne'e. Atendimentu regulár iha Ospitál tenke ser la'o, atendimentu iha Vera Cruz, Lahane mós tenke ser la'o. Númeru staff pozitivu mós aumenta, katak ema mós menus", hatete nia.

Biar nune'e, sira sei la husik situasaun refere sai nune'e de'it, maibé buka esforsu oinsá atu rezolve problema hodi hasa'e númeru atendimentu nafatin ba sidadaun sira bainhira infrenta moras.(*)