Tempotimor (Dili)-Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo informa, timoroan ida infetadu diagnóstikadu Covid (PCR pozitivu, CT Egene 22, N2gene 24,7) mate iha Postu Administrativu Gleno, Munisípiu Ermera.

"Totál óbitu ne’ebé relata ohin 23 Agostu 2021 na'in-1 (ida) mane ho idade tinan 68, Timoroan, diagnóstikadu Covid-19 (PCR pozitivu, CT Egene 22, N2gene 24,7)", dehan nia liuhusi komunikadu imprensa, segunda (23/08).

Matebian hela iha Gleno-Ermera iha 16 Agostu 2021 no  hahú hala’o izolamentu iha loron 17 Agostu tinan 2021. Matebian iha mós problema hipertensaun no iha loron 17 Agostu, pasiénte ninia saturasaun oksijénio la normal nune'e hahú hatudu sinál sindroma insufisiénsia respiratória aguda (SIRA), maibé matebian ho família lakohi atu transfere mai halo tratamentu iha Dili.

Iha loron 23 fulan-agustu, madrugada matebian isin manas, saturasaun oksijéniu tu’un-maka’a no matebian iis-kotu 11h20 dader. Família  la aseita hala’o funeral tuir protokolu ne’ebé adopta iha Timor-Leste. (*)