“Kona-bá vasinasaun ne’ebé distintu deputadu koalia, deklarasaun Primeiru Ministru mak los ka Ministra Saúde mak los, ne'e liga ba ema ne'ebé simu ona vasinasaun dala-rua. Klaru katak Governu ida de'it e Primeiru Ministru mak Xefe Governu, e saida mak nia ko’alia ne'e bazeia ba Konselhu Ministru, ida ne'e aas liu”, hatete nia iha Parlamentu Nasionál, tersa (17/8).

Tanba ne'e, ekipa sira ne’ebé Governu estabelese iha baze atu implementa servisu ida ne'e tuir desizaun Konselhu Ministru kona-bá ema ne’ebé simu vasina dala-rua livre asesu ba fatin hothotu no la presiza halo teste swab.

Maibé, Ministériu Saúde bele iha razaun, tanba ema simu ona vasina dalarua, posibilidade bele transmite nafatin vírus ba ema seluk, tanba ne'e mak iha kazu espesifiku balun, ne'ebé mak Governu tenke trata ketak.

“Ne’ebé hakarak klarifika iha ne'e katak deklarasaun Primeiru Ministru nia mak vale e funsiona ba teritóriu tomak”, dehan nia.

Deputada bankada KHUNTO, Olinda Guterres hatete, nia parte krítika deklarasaun primeiru ministru ho membru Governu tanba la koopera hamutuk.

Tanba Primeiru Ministru dehan Vasina dala rua, hatudu kartaun kinur ne'e bele la'o livre, maibé Ministra Saúde dehan labele.

“Povu pániku, no balun agora dehan vasina mós mate, la vasina mós mate, agora ema iha fatin-fatin ne'e la mate, agora mate ne'e so iha izolamentu”, afirma nia ba www.tempotimor.com liuhusi telefone kinta (19/8).

Bankada KHUNTO mós lamenta tanba ema ne’ebé infetadu tama ona izolamentu ne'e atu di’ak, maibé realidade la akontese.

“Tama ona izolamentu ne'e atu ba hadi’a sira-nia moras”, hatete nia.

Ba infensaun Covid-19 iha rai sira seluk liliu iha Indonézia, ema mate iha fatin-fatin, mak estadu tuir ba foti, maibé Timor-Leste ema mate bainhira tama iha izolamentu.

“Entaun izolamentu atu halo saida, ida ne'e mak povu ne'e pániku liu, ne’ebé husu ba Ministériu Saúde, tenke tun ba direta iha suku no aldeia sira ne'e para hodi esplika diretamente ba povu hodi nune'e povu bele kompriende”, deklara Olinda. (*)