“Kazu detetatu foun ne’ebé relata iha dia 18 de Agostu de 2021 hamutuk 226 (iha Dili 167 & Covalima 18, Manufahi 10 & Munisípiu seluk hamutuk 31). Total óbitu ne’ebé relata ohin, na’in-2 (inan isin-rua, ho nia oan iha isin)”, informa Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Maria de Araújo, liuhusi komunikadu imprensa, tersa (18/08).

Husi totál kazu detetadu foun iha mane 118, feto 107, hirak ne’e ho idade tinan 60:9. Totál kazu foun, 85 kazu ka 37,6% maka sintomátiku (hatudu sintomas).

Kazu rekuperadu hamutuk 63 no kazu ativu iha 2.507, nune’e mós kazu konfirmadu kumulativu iha 18 de Agostu 2021 (sura husi 21 Marsu 2020) hamutuk 13.155.

Nune’e mós óbitu ne’ebé relata iha loron 18 Agostu 2021, (inan isin-rua, ho nia oan iha isin) ho detalla hanesan feto, idade tinan 35, Timoroan, enkamiña husi HNGV, iha 8 de Agostu de 2021, ho diagnóstiku G6P5A0 (isin-rua dalima, tu’ur-ahi dala lima, laiha istória abortu), isin-rua semana 24, ho mós diagnostiku bronkopneumonia tan bá Covid-19 (Cycle Threshold 17,2), ho sintomas respiratorius.

“Ohin dader 10h45 iis-kotu tan bá multiple organ failure. Oan iha inan nia kanotak mós la salva. Família koordena hela ho ekipa saúde atu hala’o funeral tuir protokolu ne’ebé adopta iha Timor-Leste”, informa nia.

Husi loron 17 to’o 18 fulan-agostu, hamutuk hotu Laboratóriu Nasionál Saúde (LNS) halo 756 testes PCR iha Dili, ho detalla hanesan vjilánsia sentinel 26, rastreiu ba kontaktu (Contact tracing) 370, rastreiu aleatóriu (random screening) 54, viajen sai husi serka sanitária Munisípiu Dili 215, viajen internasionál 30, no follow up iha kuarentena 91.

Totál testes PCR ne’ebé halo iha loron 17 Agostu, Munisípiu sira seluk, REAOA & HNGV, hamutuk 366, ho detalla hanesan Baukau 47, Ermera 11, Maliana 41, Maubisse 46, RAEOA 16, Suai 38, Vikeké 17 no HNGV150. (*)