Deklarasaun ne'e, MS Odete hato'o, bainhira husu kona-ba insidente ne'ebé mosu iha loron segunda (16/08), iha sala Izolamentu Vera Cruz ne'ebé rezulta inan-isin-rua ida atu partu, maibé médiku sira preukupa halo uluk teste Covid-19, ikus mai bebé ne'ebé atu partu, labele salva (mate).

“Ha'u ladun fiar ida ne'e. Ha'u la fiar ida ne'e, tanba ha'u sempre ba vizita iha Ospitál sira, ha'u ba ne'ebá ha'u husu dehan, oinsá mak imi halo tratamentu ba pasiénte sira, la'ós ba inan-isin-rua de'it, maibé sira koko atu uza nia roupa atu fó atensaun ba inan-isin-rua sira”, dehan Ministra Odete, iha Palásiu Governu, Dili, kuarta (18/08).

Tanba iha Munisípiu Maliana (Bobonaru), médiku sira fó ona atensaun ba inan-isin-rua ne'ebé mak ho Covid 19, sein iha bainhira hodi hein teste, no teste ne'e seidauk sai, médiku sira fó uluk asisténsia ba inan-isin-rua, hamutuk na'in-20 iha Ospitál referál Maliana rasik.

“Prontu, ida ne'e ninia prosedimentu, será ke sira hein loos duni katak sira hein covid-19, tanba ha'u hatene katak iha atendimentu, sira iha roupa ne'ebé mak sira bele uza hodi halo atendimentu ba pasiénte sira. Agora, ita hakarak atu haree dehan, sé dehan sira la uza roupa ne'e atu halo atendimentu, ida ne’e mak dala-ruma ita haree ne’e karik problema. Mais ha'u hatene katak Vera Cruz ne'e, fatin izolamentu, fatin Covid-19 nian. Entaun, médiku sira sempre prontu, iha prontidaun atu bele fó asisténsia ba ema, sein hein dehan nia tenke pozitivu ka negative”, hatete nia.

Bainhira iha pasiénte ruma mak médiku sira transporta lori ona ba Ospitál Lahane, ka Vera Cruz, konserteza sidadaun ne'e suspeita duni ba moras surtu Covid-19.

“Siknifika katak ema ne'e pozitivu ona, atu halo saida. Ó tenke halo atende nia, atu hein tan saida. Sé hein tan, ida ne'e mak problema, mais ha'u la haree problema iha ne'ebá, karik dala-ruma kazu ruma ne'ebé mak diferente, ne'ebé mak ita nia espekulasaun ne'e ba hotu covid-19, la'ós”, afirma nia. (*)