“Fulan hirak liubá, seidauk resesu mós ha’u ko’alia bebeik ona ba Governu, liuhusi ministériu saúde atu halo atendimentu di’ak ba ita-nia inan feto sira isin-rua. Iha anterior ha’u dehan katak, ho situasaun Covid-19 ho tan versaun delta nian ne'e, ita oho ita-nia povu ne'e malorek de'it”, hatete Deputadu Luis Roberto, iha plenária Parlamentu Nasionál (PN), tersa (17/08).
Tanba, tuir kronolojia, inan feto ho naran Anita Maia, husi Maliana, nia kondisaun isin-rua, evakua husi Suai, ba Klínika Lanut saudozu Doutor Daniel nian, maibé labele atende no haruka ba Hospitál Nasionál Guidu Valadares (HNGV).
Maibé, to'o iha HNGV doutor sira la halo atendimentu di'ak, no sira halo filafali teste swab ba matebian ne'e no identifika inan feto refere infetadu covid-19, ho ida ne'e haruka kontinua filafali ba Vera Cruz.
Bainhira to'o iha Vera Cruz pesoál sira ne’ebé atu halo atendimentu ba inan feto gravida ne'e laiha, entaun sira buka doutora sira ba mai, no ikus konsege rezulta duni bebé oan ho nia inan mate fatin.
Hafoin matebian hakotu iis iha Vera Cruz, parte pesoál saúde sira la fó informasaun, no to'o agora família sira nafatin hein hela hakarak rona informasaun klaru ida husi doutor sira, kona-bã kauza saida mak inan feto ho oan ne'e mate.
Tanba ne'e husu nafatin ba Ministériu Saúde, atubele orienta pesoál saúde ka doutor sira terenu tenke halo servisu ho profisionál, atu halo atendimentu ba ema liliu inan feton sira ne’ebé ho kondisaun grávida.
Família Matebian, Domingos Barreto nu'udar tiun husi matebian Anita Maia Freitas konsidera atendimentu iha sala izolamentu hamosu dúvidaa
Tanba Matebian Anita Maia Freitas (37) hakotu iis ho bebé fulan sia mate iha sala izolamentu Vera Cruz, segunda (16/08).
“Tanba horikalan ne'e ami haree sira-nia atendimentu ne'e, ba ami familia mós, tanba horkalan ami mós iha ne'e to'o dader tuku lima mak ami foin sai husi fatin ida ne'e, sira-nia atendimentu ne'e mak ema gravé ona mak ita foin lalin ida ne'e lalin ida ne'ebá, ami família iha ne'e haree ho matan, ami família la'ós naran ko'alia”, dehan Domingo Barreto iha Sala Izolamentu Vera Cruz, tersa (17/08). (*)
