“Eleisaun sira ne'ebé sei halo husi ne'e ba oin, sei lahanesan ho eleisaun iha tinan hirak liuba, tanba impaktu husi pandemia Covid-19. Covid-19 impoin tan todan boot lubun ida ba todan sira ne'ebe ejiste ona iha Timor-leste nia esperiénsia eleisaun sira”, dehan nia iha PN, segunda (16/08).
Maske, durante periodu propagasaun covid-19 iha mundu tomak, nasaun kuaze 80 mak deside adia sira-nia kalendáriu eleitorál, maibé Timor-Leste mantein realiza eleisaun.
Tanba, informasaun ne'ebé PN hetan husi fonte balun husi konvensaun internasionál kona-ba sistema eleitorál nian, katak dadus pais kuaze 80 mak adia sira-nia eleisaun iha nasionál no sub-nasionál, desde fulan-fevereiru tinan 2020 to'o fulan-jullu 2021.
Ho ida ne’e, Estadu, Governu liliu orgaun eleitorál hanesan CNE no STAE presiza haree di’ak tanba pandemia Covid-19 ne'e hamosu ejizensia lubuk ida, ba ejersisiu demokrasia ne'ebé sei akontese iha tinan tuir mai.
“Estadu liliu orgaun eleitorál sira mós presiza haree no tetu didi'ak ejizensia sira ne'ebé lori implikasaun hanesan mudansa ba lei eleisaun hodi konforma ho situasaun atual ka ejizensia sira ne'ebé Covid-19 impoin”, hatete nia.
Husu atu aumenta pesoál no ekipamentu saúde nian tuir rejime Covid-19, aleinde presiza artikula di’ak liután, koordenasaun no kolaborasaun entre instituisaun no pesoál servisu sira iha terenu, liliu alokasun finaseira no lojistika hodi bele garante nafatin pesoál hotu ne'ebé hala'o servisu eleitorál atu labele lakon diretu ba votasaun.
“Presiza iha konsensu polítiku ba kalendáriu eleitorál no presiza iha sensiebilidade no responsabilidade ba ema ida-idak nia saúde no ba saúde públiku”, afirma nia. (*)