Tempotimor (Dili)-Primeiru Ministru (PM), Taur Matan Ruak, deklara iha tempu badak governu sei obriga Funsionáriu Públiku (FP) sira tama servisu tenke iha kartaun vasina Covid-19.
Iha tempu badak governu sei ezije funsionáriu públiku hothotu ne'ebé serbisu iha estadu, so tama serbisu bainhira sira iha kartaun vasina nian”, deklara Primeiru Ministru, Taur Matan Ruak, durante diskursu iha serimónia simu vasina husi governu Australia, iha SAMES, Kampung Alor, kuarta (11/08).
Iha guide line tolu, ba oin Governu hakarak responsábiliza sidadaun sira ne'ebé la simu vasina ba sira-nia risku sira-nia vida rasik. Tanba Governu komesa halo ona iha universidade sira, no iha pais balu komesa halo ona, no iha Timor-Leste mós sei aplika.
Tanba ezemplu, iha Estadus Unidus Amérika (EUA) empréza sira atende funsionáriu sira ne'ebé vasina, no ida ne'ebé laiha, tenke hela iha uma, to'o balu hasai husi servisu.
“Provavelmente, iha Timor ita sei uza ida ne'e, para que ita-nia sidadaun sira labele manán ábitu ezíje Governu de'it, akuza Governu de'it, mas sira rasik komesa sente katak ita-nia moto saúde nian katak, "ita-nia saúde iha ita-nia liman rasik". Ha'u mate ka ha'u moris, sala ne'e, loos ne'e sei iha ha'u-nia liman. Entaun, ne'e iha guide line tolu ne'ebé governu sei uza para que orienta komportamentu governu ida ha'u lidera iha ne'e ba oin”, afirma Taur. (*)