“Lamenta tebes ho insidente ne’e, no husu deskulpa ba profisionál saúde no utente sira ne’ebé simu ona vasina iha loron 10 to’o 15 fulan-juñu iha HNGV, no orienta ona ba Ministériu Saúde atu kuidadu liután iha jestaun, nune’e iha tempu sira oin mai akontesimentu sira hanesan ne’e labele akontese filafali”, deklara PM Taur liuhusi komunikadu ne’ebé www.tempotimor.com asesu iha pájina ofisiál Primeiru Minsitru, kuarta (11/08).

Tanba tuir konkluzaun no rekomendasaun hosi Konsellu Tékniku Nasionál Imunizasaun Timor-Leste (NITAG-TL) hamutuk ho Organizasaun Mundiál Saúde (OMS), konklui katak ema sira ne’ebé simu vasina husi loron 10 to’o 15 fulan-juñu espesífiku iha Óspital Nasionál Guido Valadares konsideradu nulu/inválidu, nune’e rekomenda tebes atu simu filafali vasinasaun foun.

Hafoin hetan informasaun kona-ba vasina ne’ebé hetan estragu iha Óspital Nasionál Guido Valadares (ONGV) iha loron 5 fulan-agostu ne’e, Primeiru Ministru orienta kedas ba Inspetór Jerál Estadu atu inísia prosesu auditória ba asuntu refere, atu buka hatene kona-ba kauza husi problema ne’e.

Tuir informasaun preliminaria ne’ebé iha katak, iha loron 10 to’o 15 fulan-juñu liubá, akontese instabilidade enerjia elétrika iha ONGV hodi prejudika ba sistema refrijerasaun armazenamentu vasina AstraZeneca nian nune'e provoka irregularidades iha temperatura refrijeradór hodi hetan prejuízu sira ne'e. (*)