“Maibé saida mak guvernu husu, ha'u pesoalmente husu ba ita-nia inan-aman sira tenke partisipa iha kampaña vasinasaun tanba Ermera ne'e ikus liu munisípiu ida hetan vasina kiik liu mak Ermera nia 12% de'it”, dehan PM Taur hafoin sorumutu ho Prezidente Repúblika, Francisco Guterres 'Lú Olo', iha palásiu prezidensiál Bairopite, kinta (05/08)
Desizaun ne’ebé Konsellu Ministru foti hafoin rona informasaun husi sala situasaun Sentru Integradu Jestaun ba Krize (SIJK) kona-ba evolusaun pandemia Covid-19.
Ho Serka Sanitária ba Ermera ne'e dalan ida atu halo evita atu moras ne'e labele hadaet ba munisípiu seluk, maibé povu Ermera populasaun ne'e depende liu ba kafé.
“Entaun ha'u enkoraja sira para dalan di'ak ita atu konbate moras ne'e mak simu vasina, ita sei iha vasina sufisiente para fó ba ita-nia sidadaun sira, tanba ne'e mak ha'u enkoraja sira vasina, se ita-boot sira haree medidas ne'ebé guvernu hasai ema ne'ebé simu ona vasina dala rua nia livre”, esplika nia.
Ho variante Delta ne'ebé governu preokupa loos, tanba iha ona nasaun viziñu Indonézia no Timor-Leste mós resjista ona kazu pozitivu balu.
“Ita preokupa loos tanba ne'e mak ha'u kontinua enkoraja sira para simu Vasina ne'e importante”, dehan Taur.
Entretantu dadus jerál sidadaun pozitivu Covid-19 iha munisípiu Ermera hamutuk 589. (*)