“Señor Ministru, vasina ne’e, se ema bele ba dala-tolu entaun ami deputadu sira tauk mate be ami hakarak ba dala tolu”, dehan nia iha plenáriu PN, tersa (03/08).

Nu’udar deputadu, hakarak vasina ba dala-tolu, tanba dadaun ne'e doze daruak nian hotu ona, maske dala-rua tiha ona mós prontu simu tán vasina.

Iha fatin hanesan Ministru Asuntu Parlamentar no Komunikasaun Sosiál (MAPKomS), Francisco Martins Jerónimo hatete, kestaun kona-ba atu simu vasina ba doze datoluk ka dahaat, ida ne'e depende ba programa futuru, liuhusi estudu, maibé la’ós agora.

“Regra mak ne'e, simu Sinovac kontinua ho Sinovac, se AstraZeneca kontinua ho AstraZeneca, labele kahur. Agora iha fali dehan dala-tolu, dala haat, ne'e depende ba programa futuru sei halo estudu karik bele dala-tolu, dala-haat maibé la'ós agora”, hatete nia.

Tanba ne'e, regra lolos ne'ebé agora governu halo kona-ba AstraZeneca ne'e, bainhira sidadaun simu ona doze dahuluk, entaun hein semana 8 mak hafoin kontinua ba doze daruak.

Nune'e mós ba Sinovac, kuandu sidadaun simu tiha doze dahuluk, liu semana haat mak hafoin kontinua ba doze daruak. (*)