“Ministériu ida-idak hatene ninia ema sé sé mak sebisu hanesan liña frente, ema sira ne'ebé mak iha expose barak liu ho ema ne'ebé suspeitu hanesan kona Covid-19. Ne'e la'ós Ministériu da Saúde de'it, ami hothotu prepara ami ida-idak ninia tabela e tuir konsellu ministru, ami iha tempu fulan rua liu ita aprezenta ona dekretu lei foun ne'ebé mak ha'u hanoin ita-boot sira akompaña hela, Exelénsia Ministru Fidelis ko’alia”, informa Ministra Saúde, Odete Maria Freitas Belo, iha salaun MSSI, Kaikoli, tersa (03/08).

Maibé, dokumentu ne'e hetan veta husi Prezidente Repúblika (PR), Francisco Guterres ‘Lú-Olo’, ho razaun halo ajustamentu tan ho lei balu, molok halo promulgasaun.

“Veta maibé la siknifika katak veta lakohi osan ne’e atu ema atu simu, la'ós. Ne'e prosesu administrativu, lei sira dala-ruma ita presiza atu tenke ajusta ba malu, buat sira ne'e hotu, mak veta. La'ós dehan veta, oras ida ba ko’alia dehan Prezidente lakohi fó osan ba ita-nia liña frente sira. Ida ne'e mak ita tenke hadi'a, orsamentu ne'e iha ne'ebá, maibé presiza atu hadi’a fali dokumentu ne'e, ha'u espera katak exelénsia Ministru Fidelis hamutuk ho ministru Finanasa nian bele hadi'a filafali dokumentu ne'e, karik iha posibilidade atubele submete filafali ba konsellu ministru atu aprova e bele hetan promulgasaun husi Señor Prezidente, atu nune'e ita bele ezekuta orsamentu ne'ebá mak alokadu ona”, dehan nia.

Nune'e, pesoál sira ne'ebé durante serbisu nu'udár ema iha liña frente, sei la lakon sira-nia direitu, tanba molok governu aloka tiha orsamentu ba liña frente nian. 

“Prontu, la lakon tanba, la'ós ba saúde de’it, ha’u hakarak atu dala ida tan, la'ós ba saúde de'it. Ba sé de'it mak ita konsidera hanesan liña frente, osan ne'e la lakon tanba osan ne'e ita aloka tiha ona, agora hein dokumentu ne'ebé administrativamente, dokumentu lei, baze legál sira ne'ebé mak iha ne'e para ita bele hasai osan ne'e hodi selu ita-nia maluk sira”, afirma nia.

Antes ne’e, Ministru Finansas, Rui Augosto Gomes deklara ona katak, subsídiu ba pesoál liña frente sira sei la lakon, tanba dadaun ne'e jurísta sira halo hela diskusaun kona-ba dekretu lei liña frente sira nian.

“Ha'u só bele hatán buat ida hanesan ne'e, dekretu lei ne'e, agora dadaun ne'e ita halo hela diskusaun, para depois hahú halo koodenasaun. Jurísta sira sei halo hela diskusaun, sei iha dalan para ida ne'e. Direitu ema nian la lakon”, dehan Rui Gomes, hafoin sorumutuk ho Primeiru Ministru, Taur Matan Ruak, iha Rezidénsia, Farol, segunda (02/08). (*)