Print this page

Governu Husu Komunidade Lalika Fiar Rumoris Iha MedSos

Aimoruk Covid Aimoruk Covid foto: Ilustrasasaun

Tempotimor (Dili)-Vise Primeira Ministra, no Ministra Solidariedade Sosial no Inkluzaun (MSSI), Armanda Berta dos Santos, husu ba komunidade sira iha Suku Hera, Postu Administrativu Cristo Rei, atu labele fiar rumoris kona-ba vasinasaun ne'ebé ema lansa iha Mídia Sosial (Medsos)  Facebook.

 “Ho programa kampaña vasinasaun ne'ebé ha’u temi, katak iha Dili pursentu 60,7 (60,7%), mak vasina ona, maibé sei iha 93 mill mak seidauk simu vasina. Razaun lakohi simu vasina, tanba ta’uk e ho rumoris sira ne'ebé mak espalla iha Facebook, iha mídia, ho ida ne'e mak ha’u hakarak reafirma dala ida tan katak informasaun sira ne'e hotu laloos, labele preukupa ho informasaun sira ne'ebé mak espalla ne'ebé mak hoax (falsu) mosu durante ida ne'e”, dehan Armanda Berta, iha diskursu, durante hala’o diálogu  ho komunidade sira kona ba kampaa Vasiasaun iha Sede Aldeia Mota Kiik, tersa (27/07).

 Tanba informasaun ne'ebé ema lansa iha mídia sosiál dehan vasina ladi'ak ba saúde laloos (hoax) tanba iha mundu nunka akontese atu governu hakarak oho rasik nia povu ho vasina.

 “Tanba sá ha'u dehan hoax? Tanba laiha governu ida iha mundu mak hanoin aat ba nia povu rasik, inklui ha'u rasik inklui ita hotu iha fatin ida ne'e. Tanba atu evita Covid-19 ne'ebé mak infrenta iha mundu tomak, inklui Timor-Leste, entaun governu halo esforsu sira ne'e hotu atu bele prevene moras ne'ebé mak mosu mai iha Timor-Leste. Ho ida ne'e, governu buka esforsu implementa medidas sira tomak, hodi bele prevene Covid-19 iha ita-nia nasaun”, dehan nia.

 Nune'e, atu prevene moras surtu Covid-19 ne'e, dalan úniku tenke liuhusi vasina hodi hasa'e imunidade salva nomós nasaun. Tanba ne'e, populasaun sira iha Suku Hera presiza hola parte iha programa nasionál vasinasaun hasoru Covid-19 iha Timor-Leste.(*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items