“Kualidade armajen rai vasina nian di'ak oituan maibé, ita presiza mós fatin atubele asegura ai-moruk sira ne'ebé fornese atubele halo distribuisaun ba rejionál sira ne'e", dehan nia hafoin halo vizita ba SAMES iha Kampung Alor, kinta (22/07).

Tanba vizita ne’ebé halo ba Servisu Autonomu Medikamentu no Ekipamentu Saude (SAMES) atu haree ai-moruk jerál no mós espesifiku ba vasina Covid-19 ninian ne'ebé durante ne'e simu husi doadór sira hodi fornese ba populasaun tomak tanba ne'e mak, nia rasik hakat mai haree direta armazemamentu ho administrasaun.

Kondisaun armajen di'ak disponivel atubele asegura ai-moruk, espasu rai ai-moruk depende husi planu Ministériu ho SAMES nian atu haree ba tempu naruk nian ida ne'e importante.

“Difikuldade sira ne'ebé SAMES hato'o iha parte balun, maibé presiza ita tau mós konsiderasaun ba SAMES nian, maibé ida ne'e kompenténsia iha Ministériu Saúde nian pois lori ba Konsellu Ministru mak ita deside hamutuk, ida ne'ebé mak ita presiza duni, atu asegura ba ita-nia povu iha Timor laran tomak”, reafirma nia.

Maibé iha parte balun haree liu kona-ba jeleira malirin ne'ebé mak dadaun ne'e haree hela ba vasina ida ne'e importante, nune'e orsamentu ne'ebé mak iha aprova, atu haree mós ba korente malirin

“Ida ne'e ita la'o hela, atubele oinsá husu Ministériu Saúde ho UNICEF oinsá bele haree korente malirin ba vasina nian”, hatete Armanda.

Prosesu bá sosa vasina pfizer ne'e kompenténsia husi Ministériu Saúde ho UNICEF atubele haree kona-ba aprozinomentu.

Iha fatin hanesan Diretór Ezekutivu SAMES, Francisco Borges, agradese ba vizita supreza husi  Vise Primeira Ministra hodi haree, rona rasik situasaun saida mak dadauk ne'e akontese iha SAMES espesifiku liu haree kona-ba oinsá SAMES nia preparasaun hodi halo distribuisaun ba vasina sira hodi prevene pandamia Covid-19.

“SAMES aprezenta kona-ba preparasaun nomós difikuldade sira ho buat ruma ne'ebé durante ne'e SAMES enfrenta hodi hala'o nia servisu”, dehan nia.

Primeiru kona-ba rekursu SAMES nian rasik, atubele hetan rekursu sira ne'ebé liliu tékniku profesionál sira atubele hala'o servisu di'ak liután, segundu mak kona-ba servisu apoiu ekipamentu sira atubele suporta servisu ema ninian no ko'alia kona-ba oinsá atu reforsa hodi hametin liután servisu SAMES nian la'ós de'it iha sentrál maibé to'o rejionál liliu kona-ba vasina nian.

“Ita propoin para depois tempu badak ne'e ita bele kria ona kondisaun, tanba governu atu sosa tan vasina pfizer ne'ebé mak tama mai", haktenik nia. (*)