Reprezentante Komisaun Interministeriál ba Implemetasaun Vasina  Covid-19 iha Timor-Leste, Elio Guterres, enkoraja komunidade sira iha sede suku Bairopite atu hakbesik-an ba iha Sentru Saúde hodi simu vasina atubele prevene-an husi vírus Covid-19.

“Ha’u hakarak enkoraja de’it ba komunidade sira iha ne'e, atubele mai simu vasina hodi bele prevene ita-nia an husi vírus Covid-19, tanba ita haree ita-nia nasaun vizinu sira mate barak los entaun liuhusi vasina ida ne'e ita bele prevene-an husi covid-19 atu labele hadaet ba ita, no ita-nia família, nune'e ita-nia rai labele iha moras covid ne'e”, dehan Elio iha Sede Suku Bairopite, kuarta (21/07).

Iha fatin hanesan Sekretáriu Adjuntu Munisípiu Dili, Antonio Clão, agradese ba governu ne'ebé liuhusi ministra Saude (MS) ho nia ekipa tomak ne'ebé mak prontu suporta autoridade komunitária sira hodi la'ó hamutuk no hakbesik-an nafatin ba komunidade sira hodi tuir vasina

“Agradese ba Oitavo Governu tanba bele suporta ami autoridade komunitaria hodi la'o hamutuk, hakbesik-an ba ita-nia Komúnidade sira-nia uma, tama sai uma hodi bolu inan aman sira atubele mai simu vasina hodi bele prevene an husi Vírus Covid-19 ne'e”, dehan nia.

Haree ba totál populasaun iha Posto Administrativu Don Aleixo hamutuk rihun-85.270, ne’ebé iha rihun-36.305 simu ona vasina no seidauk simu vasina hamutuk rihun-48.965. Nune’e mós iha suku Bairopite totál populasaun hamutuk rihun-27.228 no sira ne'ebé simu ona vasina ne'e hamutuk rihun-11.921 no seidauk simu vasina hamutuk rihun-15.307.

Entertantu Komisaun Interministeriál ba Implemetasaun Vasina Covid-19 iha Timor-Leste, hala'o kampaña vasinasaun iha suku Bairopite ho nia aldeia hamutuk 25, ne'ebé mak pretense ba posto Dom Aleixo, Munisípiu Dili no kampaña ne'e halo uluk ba aldeia 9, aban kontinua ba aldeia 9 no bairua mak kontinua ba aldeia 8.

Bainhira kampaña ne'e ramta Komisaun Interministeriál ba Implemetasaun Vasina Covid-19 kontinua kedan halo vasinasaun ba komunidade sira iha sede suku refere. (*)