“Imi (jornalista) iha direitu se imi hatene imi iha obrigasaun, imi iha direitu atu husu, senora Ministra los ka lae?. Horibaihira ita-boot deklara oin seluk agora deklara oin seluk. Antes ita-boot sira-nia publikasaun, se lae ha'u mós triste hamriik iha ita-boot sira-nia oin ha'u saugate de'it, ha'u hamriik iha ita-boot sira-nia oin ha'u hakarak partilla informasaun, hanesan ema ita la sees husi sala, dalaruma imi husu buat barak prontu ita ko'alia maibé ita hothotu haree ba lei rezolusaun diploma sira ne'ebé mak ita-nia Governu fó sai, " dehan Odete iha Ministériu Solidariedade Sosiál no Inkluzaun, Kaikoli, segunda (12/07).
Tanba ne’e, Ministra Odete fó sai filafali katak, ema ne'ebé Vasina Dalarua inklui labarik ho idade tinan neen (6) mai kraik mak la'o hamutuk ho nia ona ka aman ne'ebé simu ona vasina dalarua mós la tuir test Swab.
"Se ita-boot sira hakarak lee didi'ak, la'ós ba ita de'it, maibé labarik ne'ebé mak menus husi seis anos la'o ho sira-nia inan ne'ebé mak simu Vasina dalarua sira la presiza swab, segundu, ba ita sira ne'ebé mak simu ona Vasina dalarua ita sirkula iha ita-nia rai laran la presiza swab, ha'u hakarak atu haloos filafali informasaun ida ne'e”, esklarese nia.
Hahú fulan Jullu, iha ona rezolusaun ne'ebé mak Konsellu Ministru públika katak, ema ne'ebé simu Vasina Dalarua livre movimentu, siknifika la tuir ona teste Swab.
Nune'e, Ministra Saúde deklara iha loron 9 fulan-Jullu iha Servisu Autonomo Medikamentus Ekipamentu Saúde (SAMES) rekoñese iha erru.
"Rezolusaun ida ne'e iha kedas dia 1 de Jullu, agora ohin ita iha loron segunda (12/07), dia 1 de Jullu ne'e ita aplika tiha ona vasina dalarua ba Munisípiu livre los ka lae?. Ha'u mós ba distritu ha'u la swab tanba ha'u haree ba rezolusaun ne'ebé iha. Los duni katak iha tempu ne'ebé ami halo termo de entrega sasán iha SAMES ha'u ko'alia buat ruma kala iha erru ida iha ne'ebá”, afirma nia.
Maibé Ministra Saúde kestiona kapasidade jornalista bainhira halo publikasaun balu ne’ebé halo kondis no kontra, tanba sidadaun bainbain ne’ebé halo publikasaun la hanesan ho mídia sira ne’ebé publiku informasaun ba públiku.
“Ha'u intende bainhira públiku mak halo publikasaun ne'e buat seluk tanba la hatene mais se jornalista mak publika, ha'u kestiona ita-boot sira-nia matenek ne'e to'o iha ne'ebé?. Tanba ita-boot sira mobiliza ba distritu sein halo teste imi la'o ba mai e depois to'o ikus mai ha'u ko’alia sala ne'e imi tau kedas iha tópiku Ministra saúde ko'alia oin seluk ida ne'e la di'ak”, nia deklara. (*)