Tempotimor (Dili)-Ministra Saude (MS), Odete Maria Freitas Belo, husu ba funsionáriu públiku (FP) tenke agradese no orgullu hetan servisu iha administrasaun públiku, tanba timoroan barak hakarak servi maibé la hetan oportunidade.

Tanba ne'e, husu funsionáriu Públiku ne’ebé oras ne'e hetan ona oportunidade, tenke orgullu nafatin, hodi hola partisipasaun máximu iha komemorasaun loron nasionál Komisaun Funsaun Públika (KFP) ne’ebé sei realiza ba dala-hitu iha Timor-Leste.

"Ha’u hakarak atu dehan ita orgullu sai funsionáriu públiku, ema barak hakarak sai funsionáriu públiku maibé la hetan. Se ita iha oportunidade sai hanesan FP, loron KFP nian ne'e ita tenke mai, halo festa netik”, hatete Odete hafoin partisipa atividade Marsa Saudável iha Largo Lesidere, sábadu (10/07).

Komemorasaun loron nasionál ne'e la halo festa, tanba nasaun hothotu inklui Timor-Leste dadaun enfrenta hela situasaun kalamidade pandemia covid-19.

Maibé la taka dalan mós ba Komisaun Funsaun Públika no funsionáriu públiku tomak atu komemora loron inportante ida ne'e, liuhusi atividade hanesan la'o ain hodi bele fó saudável ba sira-nia an. (*)