“Totál husi populasaun iha Dili 213.800, ne'ebé simu ona vasina Covax, AstraZaneka Austrália no Sinovac hamutuk 107.609 nune'e kobertura primeira doze atinje ona pursentu 50”, informa Portavóz Komisaun Intermenisterial ba Implementasaun Vasina Covid-19, Danina Coelho, iha Ministériu Solidaridade Sosial no Inkluzaun (MSSI), Kaikoli, sesta (25/06).

Husi ema hamutuk 180.000 mak simu ona vasina Covid-19 doze dahuluk, husi 25.000 mak simu ona doze daruak durante kampaña vasinasaun, husi totál 25.000 liu mak simu ona vasina doze daruak inklui 11.000 liu iha munisípiu sira no kuaze 14.000 iha Dili.

“Kampaña vasinasaun aselera makaas iha semana liuba, iha loron balun ho media ita halo 4.000 vasina Covid-19 doze dahuluk iha Dili”, hatete nia.

Maibé sei kontinua enkoraja sidadaun sira ho tinan 60 ba leten no sira ho moras komorbidade atu simu vasina hodi proteje sira-nia an hosi Covid-19.

Tanba ne’e kampaña vasinasaun halo hela ba ema hotu ho tinan 18 ba leten iha kapitál Dili, maibé iha munisípiu sira sei kontinua doze dahuluk hodi fó prioridade ba ema tinan 60 ba leten no sira ho moras kroniku, nune’e mós ba doze daruak ba profisionál saúde no liña frente sira.

Entretantu totál kumulativu husi vasinasaun primeira doze iha munisípiu Dili atinje pursentu 50, iha munisípiu sira pursentu 12 no doze daruk iha Dili pursentu 7, iha munisípiu pursentu 2.

“Desde ínisiu kampaña vasinasaun laiha kazu ida ne'ebé grave”, dehan nia. (*)