Transporte hirak ne'e PNTL prende, liuhusi atividade operasaun ka passa revista ne'ebé halao iha segunda loron (07/06), tempu kalan, iha estrada públiku besik Komandu Jerál Kaikoli, Postu administrativu Verra Cruz, Munisípiu Dili.

"Iha segunda (07/06) kalan Motorizada 69, karreta ida, la lori karta kondusaun, sira ne'e tama iha tipu infrasaun, laiha xapa matrikula", informa Komandante Tránzitu no Seguransa Rodoviária, Superintendente Polísia, João Belo iha Komandu jerál PNTL, Kaikoli, kinta (10/06).

PNTL sente preukupa, bainhira sidadaun sira halo movimentu iha tempu kalan, maibé laiha dokumentu motorizada ho karreta, deskonfia bele mosu instabilidade seguransa iha rai laran.

"Ita preukupa tempu hanesan ne'e mak laiha xapa matrikula ne'e intensaun aat. Derepente situasaun ne'e”, dehan Belo.

Tuir lei seguransa rodoviária, bainhira transporte públiku no privadu sira ne'ebé PNTL prende liu ona loron 90 mak na'in laiha interese atu foti fila, mak komandu liuhusi departamentu Tránzitu no Seguransa Rodoviária, sei aprezenta ba Ministériu Públiku (MP), hodi halo prosesu ba lelaun.

"Transporte sira para barak iha laran, liu ona prazu. Tanba 90 dias bele foti ona, sé liu ona prazu, sei aprezenta aa ministeriu públiku”, haktenik nia.

Entretantu, atividade passa revista ne'e nu’udar kampaña seguransa rodoviária hodi eduka sidadaun sira respeita lei tránzitu inklui halo sensibilizasaun ba komunidade sira atu kumpri nafatin regra Serka Sanitária iha kapitál Dili. (*)