Matebian ne'e mane ho idade tinan 48, hela iha Maliana, iha 27 Maiu 2021 ba Hospital Referensia Maliana (HRM), tanba Iis-boot, mear ho isin manas durante loron 4 antes.
Matebian nia istória diabetes ho tensaun a’as iha HRM halo teste PCR, deteta pozitivu ho CT N2gene24,5 ho Egene 22,7, hafoin enkamiña, iha loron ne’e kedas, ba fatin izolamentu Vera Cruz, ho diagnoze traballu Pneumonia grave tamba COVID-19.
Durante iha Vera Cruz halo tratamentu tuir protokolu ne’ebé iha, inklui terapia ho oksijéniu liu husi ventilasaun asisitida ho CPAP1.
Iha loron 31 fulan-maiu ekipa médika desidi halo intubasaun hodi liga ba ventiladór ho nafatin fó tratamentu sira seluk.
"Ohin dader matebian iis-kotu tanba respiratory failure/fallansu respiratóriu no família ho ekipa saúde sira sei kordena hela kona-ba funeral", dehan Rui liuhusi komunikadu imprensa, sesta (04/06).
Dadaun ne'e, Timor-Leste rejistu ona kazu Covid-19 konfirmadu hamutuk 7511 no mate hamutuk 17 nune'e munisípiu Dili rejistu ona nu'udar númeru kasu Covid-19 as liu. (*)