"Ita akompaña, haree katak, durante tinan barak nia laran mak ita-nia referénsia ba moras krónika sira ne'e ba liur liliu moras kardiu nian, moras kankru nian mak ita refere barak liu ba liur. Entaun, ho esforsu ida ne'e mak agora dadauk ne'e ministériu saúde planu ona atubele haree primeiru kona-ba rekursu umanu”, hatete Vise Ministru Saúde (VMS), Bonifaçio "Maukoli" dos Reis, iha Ministériu Finansa, Ai-tarak Laran, kuarta (02/06).

Tanba, governu komesa forma ona espesiálista sira,  haruka barak ona ba liur, no presiza sub espesiálista tan, atubele halo operasaun ba problema fuan nian ne'ebé mak dala-barak haruka ba liur.

Aleinde ne'e, sei prepara mós infraestrutura nian, ne'ebé oras ne'e planu mestre (master plan) ba konstrusaun edifísiu foun ba Hospitál Nasional Guido Valadáres (HNGV) nian oras ne'e la'o hela.

"Iha tinan ida ne'e (2021), ita hahú uluk ho konstrusaun ba pedeiatria sinku andáres. Ida ne'e hotu para ita bele dezmantela ona uma sira ne'ebé mak liu tinan haat-nulu-resin ona que komdisaun mós ladi’ak, para ita bele hadi'a", dehan nia.

Iha tinan 2021, MS sei instala mós ekipamentu ba kardiolójia nian, tanba matérial sira preparadu no hein de'it iha fulan-juñu nia laran ne'e sei transporte husi rai liur hodi instala iha HNGV halo atendimentu ba ema ho moras fuan.

"Ita-nia medida mak ita tenke hahú agora, labele hein tan. Sé ita hein maka sei haruka pasiente ba liur, ita sei gasta osan mós barak liután”, haktenik nia. (*)