"Iha mensájen ba Parlamentu Nasionál husu autorizasaun ba deklara estadu emerjénsia dala ida tan tanba Xefe Estadu preokupa tebes ho númeru kazu konfirmadu ho vírus Covid-19 nian sae babeibeik no diariamente afeta ema liu atus ida", dehan PR liuhusi komunikadu imprensa, domingu (30/05).

Tanba ne’e, husu ba sidadaun hothotu kumpri regra hatuur durante  estadu emerjénsia.

Haree ba Timor-Leste iha hela kazu ativu konfirmadu  2666 husi totál 6014 sura hamutuk husi fulan-marsu 2020 no ema na’in-14 mak moras todan ho kauza oioin no mate no iha mos vírus Covid-19 nian.

"Figura públika ho responsabilidade labele hatete katak sira hadomi povu no preokupa ho moris-di’ak no saúde povu nian maibé la kumpri fali regra bázika ba protesaun hanesan distansiamentu sosial no uza máskara ka la respeita konfinamentu domisiliáriu, ho motivu ne'ebé de'it ka ho hanoin ba sira-nia an de'it", dehan Lú Olo.

Tanba halibur ho populasaun iha fatin públiku lahó máskara no lahó  distansiamentu sosiál sei la kontribui atu hapara vírus corona  maibé sei loke dalan ba vírus at ne'e e hadaet liután husi ema ba ema.

"Saída mak populasaun  hanoin ba nia obrigasaun atu haktuir konfinamentu domisiliáriu bainhira nia haree  figura públika ida halibur ho ema ka la'o ba-mai ho ema atu haksolok-nia an deit?", hatete nia.

Iha ninia mensájen ba Parlamentu Nasionál bainhira husu autorizasaun atu renova estadu emerjénsia hahú husi zero oras,  loron 2  fulan-juñu tinan 2021 (kuarta) to’o  23 oras 59 minutus  loron 1  fulan-jullu  tinan 2021 (kinta), iha territóriu nasionál.(*)