Vasina mosu iha situasaun ida ne’ebé, Timor-Leste hetan importasaun transmisaun komunitaria husi moras aat Covid-19 no hada’et tutan ona ba komunidade.

"Ohin ha'u mai iha ne’e ho funsionáriu sira, atu simu vasina ida ne’e, ne’e hanesan parte husi Prezidente Repúblika nian hodi koopera ho estadu tomak e atubele halo mós prevensaun pesoalmente ba ha’u-nia saúde e saúde ba família tantu ba komunidade mós purke Prezidente kontaktu ho ema barak”, dehan Lú Olo hafoin simu vasina iha palásiu prezidensiál Bairropite, tersa (25/05)

Ho ida ne’e, husu ba komunidade sira hotu no ba populasaun tomak hothotu simu vasina atubele livre hala’o atividade lotoloron.

“Ha'u husu ba komundidade hothotu, ita hotu koopera, ita hotu simu vasina, para ita bele proteze ita-nia an, ita-nia família no ita-nia komunidade tomak”, dehan Lú Olo.

Iha fatin hanesan Diretór Jerál Ministériu Saúde, Odete da Silva Viegas deklara, Prezidente Repúblika ho nia funsionáriu hamutuk 200-resin mak simu vasina.

"Ami agradese se ema barak liután hakarak partisipa iha vasina ida ne'e, tanba ita-boot sira hatene katak, vasina mak meius ida atu proteze ita-nia an, ita-nia família no ita-nia komunidade husi invensaun moras Covid-19 ne'e rasik”, dehan nia.

Husi fulan-abríl to'o mai agora iha territóriu laran tomak ema ne'ebé simu vasina kuaze rihun-57. (*)