Ho matebian ne’ebé hakotu iis iha uma, totál mate ho Covid-19 hamutuk ema na’in-13, ida husi Likisá no sidadaun Xineza ida mate tanba Covid-19 mak total hamutuk na’in-14.
“Totál óbitu ne’ebé relata ohin, 25 fulan-maiu 2021 na'in-1, mane ho idade 35 nune'e óbitu hamutuk 14”, dehan Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo liuhusi komunikadu imprensa, tersa (25/05)
Matebian ne'e sidadaun timoroan hela iha aldeia Mota Ki’ik, Suku Hera, Postu Administrativu Cristo Rei.
Tuir istória husi família, isin-manas ho mear durante semana 2 ona iha uma. Laiha istória moras seluk no iha loron 25 fulan-maiu, dader iha kontaktu ba númeru 119 informa katak ema monu derepente iha uma.
“Ekipa konjunta saúde to’o iha nia hela fatin maibé matebian iis-kotu tiha ona ho autorizasun família nian, ekipa konjunta halo swab post mortem no deteta pozitivu SARS-CoV2 ho Cycle Threshold (CT) N2gene 36,4, Egene 34,8”, esplika Rui.
Maibé, família la aseita rezultadu teste PCR no seidauk aseita atu halo funerál tuir protokolu Organizasaun Mundiál Saúde (OMS) no Ministériu Saúde ne’ebé iha. (*)
