"Hakarak atu fó sai mós ba komunidade liliu ema sira ne'ebé mak 60 anos ba leten atubele hakbesik, ba fasilidade saúde atubele simu vasina nomós ema sira ne'ebé mak ho moras. Moras saida de'it, laiha kontra indikasaun atu simu vasina. Bele hetan vasina”, hatete Odete Viegas hafoin partisipa iha reuniaun Konsellu Ministru (KM) iha MF Ai-tarak Laran, kuarta (19/05).
Durante halo vasina ba populasaun sira, seidauk rezulta ema ruma mak moras todan ka mate, nune'e nia apela ba populasaun tomak, atu hakbesik-an ba fasilidade saúde no postu vasinasaun sira ne'ebé estabele ona, hodi simu vasina, atubele redúz moras husi ema ida-idak nia isin.
"Sé ita hetan vasina, ita bele garante katak, sé ita hetan moras ne'e mós, ita latama ona ba situasaun gráve ou ita la tama ona ba ospitálidade”, afirma nia.
Tanba ne'e, husu ba públiku atu labele rona rumoris oioin ne'ebé ema hamosu, maibé fiar nafatin ba profesionál saúde sira ne'ebé hala'o hela atendimentu saúde ba populasaun sira.
Entretantu, vasina faze dahuluk nian ne'ebé hala'o iha (07/04) to'o (30/04), populasaun hamutuk rihun 28,668 mak simu ona Vasina AstraZeneca.
Ba segunda faze, foin dadaun ne'e to’o loron 18 fulan-maiu iha ema rihun-20,92 mak simu ona vasina.
“Ita vasina ne'e liu tiha ona kuaze 50 mill ona mai ita vasina, e ohin (19/05) sei to'o tan vasina 20 mill dozes husi Austrália no ida ne'e, aban (20/05) ita kontinua fó nafatin ba populasaun sira”, esplika nia. (*)
