Husi na’in-3 ne’ebé mosu iha Dolokoan, tanba hetan salva husi manu mutin ida iha tasi klara, maske sira laiha ona esperansa, maibé grasa maromak nian sira konsege livre to’o iha rai maran.
Pasajeiru Moises Tomé, bainhira konta tuir, momentu ne’e lakon ona esperansa, maibé buat ne'ebé halo primeiru mak husu ajuda ba Maromak no husi ne’e mak hamosu milagre liuhusi animal no aí-maran ne’ebé sira uza hodi salva-an.
"Ró tun (mout) ona ami laha esperansa ona maibé ami husu ajuda ba Maromak atu salva ami, no ami konsege hetan aikabelak ida maibé ami na’in-tolu kedas ne'e ami la komfortavel, maibé derepente de'it mosu ai-hun boot ida kuaze naruk liu metru ida, ne'ebé manu mutin ida tur iha leten hodi tahek nia liras no ami konsege nani ba ai ne'e hodi dudu mai rai maran", haktuir Moises ho tanis iha sala emerjénsia HNGV (16/05).
Tuir kronolojia sira viajen husi Dili ba to’o iha tasi klaran laloran boot baku ró dalarua de'it volume bee-ró tun ba liu ba tasi tanba lori sasán todan.
"Ami to'o iha klaran tasi laloran komesa boot ona halo ró haksoit dala rua de'it ró ne'e todan nian kidun ne’e tasi been tama kedan ró laran ami atu salva-an hatun semente ba tasi laran mós labele ona, volume ró mout lalais liu tanba sasán todan”, nia konta.
Husi tasi klaran korente tasi lori sira ba mai loos kalan tomak iha tasi klaran no sente hamlaha maibé iha oras madrugada derepente mosu tubaraun kiik ida ne'ebé mosu tenta tata vítima na’in-tolu.
Maske ho esforsu atu ses-an husi ikan ne’e, maibé tubaraun ne’e konsege vítima ida ho naran Nunu Alves nia ain, nune'e sira oho tubaraun ne'e hodi hán filafali tanba sente hamlaha ona.
Bainhira sira oho tubaraun ne’e no obrigadu-an hán ikan matak, tanba sira mós sente hamlaha no laiha ona forsa, maibé sira mós lori ikan ulun hatudu ba polísia hanesan evidénsia ida. (*)