“Durante semana ida konfinamentu domisiliáriu SIJK deteta kazu pozitivu Covid-19 na'in-835, rekuperadu na'in-487 no testes PCR 7241”, informa Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo, liuhosi komunikandu imprensa, sábadu (08/05).
Kazu detetadu foun durante oras 24 nia laran iha munisípiu Dili hamutuk 142 no munisípiu seluk inklui RAEOA 4, rekuperadu iha 5 no kazu ativu 1506.
Husi totál kazu detetadu foun ne’e iha mane 77 no feto 69 ho idade tinan 12 na'in-4, idade entre tinan 12-59 na'in-139 (95,2%) no idade 60 na'in-3.
Proporsaun kazu sintomátiku hamutuk 2% no totál kazu konfirmadu kumulativu iha loron 8 fulan-maiu tinan 2021 (sura husi 21 Marsu 2020) hamutum 3111.
Durante loron rua nia laran Laboratóriu Nasionál Saúde (LNS) halo 1692 testes PCR iha Dili, ho detalla hanesan, vijilánsia sentinela 28, rastreiuba kontaktu (contact tracing) 151, rastreiu aleatoriu (random screening) 895, viajen sai husi serka sanitária Munisípiu Dili 564, viajen internasionál 10 no follow up iha kuarentena hamutuk 44. (*)
