Prezidente Komisaun Interministerial Planu Vasinasaun, Armanda Berta dos Santos hatete, Governu Timor-Leste sei lansa kampaña vasina hasoru Covid-19 ba ema tinan liu 60 no ema ne'ebé ho komorbilidade.

"Ho laran haksolok tebes mak ami fó sai anunsiu lansamentu vasina ba ema ho idade 60 ba leten, adultu ho komorbilidades nomós grupu prioritariu sira seluk, ne'ebé sei lansa iha loron 10 fulan-maiu iha Dili”, dehan Armanda Berta ne'ebé hato'o liuhusi konferénsia imprensa iha MSSI Kaikoli, sábadu (08/05).

Nia informa, iha tempu tuir mai kampaña vasinasaun sei implementa iha territóriu laran tomak no sei fó ba ema hotu-hotu ne'ebé bele simu vasina ne'e.

Kampaña vasinasaun hasoru Covid-19 lansa uluk husi Primeiru Ministru Republika Demokratika Timor-Leste iha loron 7 fulan-abril iha Sentru saúde Formosa iha Dili.

Nune'e, faze dahuluk kampaña hala'o ba 20% populasaun, ne’ebé mak la'o dadaun hela, vasina ne'e simu husi programa COVAX.

Iha faze dahuluk ne'e, ema liu 28,500 mak simu ona vasina, inklui pesoál husi setór saúde no husi setór sira seluk ne'ebé halo parte servisu essensial liña frente nian iha territóriu tomak.

"Ho dose adisional ne'ebé mai husi Austrália, ita bele komesa ona mós vasinasaun ba ema ho tinan 60 ba leten no ema ho komorbilidades sira hanesan prevé ona iha planu nasional vasinasaun nian”, hatutan Ministra. (*)