Koordenadór Forsa Tarefa ba Prevensaun no Mitigasaun Surtu Covid19 iha TL, Rui Maria de Araújo hatete, iha izolamentu Vera Cruz halo tratamentu ba kazu detetadu na’in 33. Iha área obstetrisia nain 11, medisina interna na’in 17, pediatria na’in 5.
“Sira na’in-11 iha obstetrisia, kategória moderadu hotu, sira-nia kondisaun estável. Ida mak ho gravidez 42 semana, maibé iha kondisaun ‘’Intrauterine Fetal Death-IUFD’’. Médiku espesialista sira fó hela asisténsia espesializada”, dehan Rui liuhosi Komunikadu Imprensa, kinta (06/05).
Iha mós na’in-17 iha medisina interna, 4 grave (uza hotu oksijéniu), na’in-13 moderadu. Husi kazu 5 pediatria, 4 moderadu, 1 grave. Iha na’in-1 grave uza Continuous positive airway pressure (CPAP), no 4 moderadu la uza ona oxijéniu.
Aliende ne’e, kazu detetadu foun ne'ebé relata iha loron 06fulan-maiu tinan 2021, hamutuk 84, iha Dili 65, no iha Munisípiu sira seluk iha na’in-19. Nune'e totál kazu ativu hamutuk ona 1417.
Husi númeru kazu ne’e mak totál kazu konfirmadu kumulativu iha loron 06 fulan-maiu tinan 2021, sura husi loron 21 fulan-marsu tinan 2020 hamutuk 2870. Maske iha kazu pozitivu hamutuk 84, maibé iha mós kazu rekuperadu ne'ebé relata iha oras 24 nia laran ho totál 81. (*)
