Tempotimor (Dili)-Família pasiénte inan isin-rua ne’ebé nia bebé mate iha kabun promete sei lori prosesu tuir dalan legal, tanba la satisfas ho atendimentu pesoál saúde nian izolamentu Vera Cruz.

Insidente ne'ebé mosu iha loron kinta (06/05/2021), inan isin-rua nia bebé mate iha kabun laran, tanba ne’e Rosito de Sousa (nu'udar la'en husi pasiénte Covid-19) hakarak prosesu kazu atendimentu pessoál saúde ne'e prosesu ba oin.

“Ha'u informa ona ba parte hothotu katak atendimentu la di'ak ne'e ha'u sei lor ba tuir dalan legal, tanba saida mak pesoál saúde atende ita-nia família ladún di'ak?. Afinál governu fakar osan millaun ba millaun”, deklara Rositu Sousa iha sala izolamentu Vera Cruz, kinta (06/05).

Nia dehan, kuandu ema moras komplikasaun ruma mak tama iha izolamentu ne'e difísil tanba atendimentu ladún di'ak.

“Ema moras komplikasaun ruma mak mai iha ne'e susar duni tanba iha laran ne'e sira dehan nunka hemu aimoruk. Iha fatin ne'e mak ema dehan Corona ne'e polítika duni”, afirma nia

Tuir kronolojia ne'ebé aman husi matebian bebe, Rosito Sousa haktuir, nia kaben kanotak moras, sira ba klínika Kampun Baru, no iha ne'eba pessoál saúde sira transfere fali ba Hospitál Nasionál Guidu Valadares (HNGV), tanba sente kantoak moras maka'as.

Nune’e, hafoin to'o iha HNGV, pesoál saúde sira halo kedas teste swab ba bebe nia inan, no rezultadu mai hatudu pozitivu, maibé ho rezultadu ne’e parte saúde mós seidauk garante katak, bebe nia inan ne’e pozitivu.

Entaun, to'o tuku 2:00 otl madrugada, pesoál saúde halo tan teste swab, ikus mai rezultadu pozitivu, nune'e nia La’en kopera ho pessoál saúde sira hodi transfer kedas mai iha sala izolamentu Vera Cruz.

To'o iha izolamentu, doutor ida-idak mai koko kondisaun bebé nia inan, depois sira informa fali katak, bebe atu partus sei lori oras 12, no momentu ne'e aman Rosito Sousa sente bebé nia fuan lanormal ona, nune'e doutór sira koko fila-fali to’o labarik la iha tiha de'it (mate). (*)