Kazu hirak ne’e kompostu husi Munisípiu Dili 46, munisípiu seluk 2 no totál kazu konfirmadu kumulativu iha loron 2 fulan-maiu tinan 2021 (sura husi 21 Marsu 2020) ho hamutuk na'in-2444.

"Kazu detetadu foun na'in-48, husi munisípiu Dili 46, munisípiu seluk 2, idade tinan 12 mai kra'ik na'in-1, mane 32, feto 16, kazu rekuperadu na'in-26, kazu baixa 1260 no asintomátiku 100%.(87,2%)", dehan Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo liuhusi komunikandu imprensa ne'ebé www.tempotimor.com asesu, domingu (02/05).

Rezultadu husi totál kazu detetadu foun 15 (31,2%) deteta tanba halo teste ho razaun atu halo viajen ba munisípiu ka estranjeiru hafoin deteta pozitivu.

Durante loron nia laran, Laboratórium Nasionál Saúde halo 579 testes PCR iha Dili ho detalladu hanesan, vijilánsia sentinela 36, rastreiu ba kontaktu (Contact tracing) 87, rastreiu aleatoriu (Random Screening) 137, biajen sai husi serka sanitária Munisípiu Dili 306, viajen internasionál 4 no follow up iha kuarentena 9.

Total testes PCR ne’ebé halo horiseik loron 1 fulan Maiu iha Munisipiu sira seluk hamutuk 257, ho detalle hanesan, Baukau 111, Maliana 19, Maubisse 124, no Viqueque 3. Teste follow up ba sira iha fatin izolamentu 48 (24 negativu ona no 24 sei nafatin pozetivu).

Haree ba situansaun ne'e, iha grafiku hatudu katak média (rata-rata) ba ohin loron, husi insidénsia Covid-19 iha Timor-Leste loron 7 ikus maka 5,9/100 mil abitantes, enkuantu ba de'it Munisípiu Dili nian 19,7/100 mil abitante.

Ho insidénsia sira ne’e, sei nafatin hatudu katak Munisipiu Dili mak fatin ho risku boot liu atu populasaun hetan da’et ka hada’et tutuan vírus SARS-CoV-2.(*)