Tempotimor (Dili) - Governu liuhusi Gabinete Sentru Integradu Jestaun ba Krize (SIJK) simu tan doasaun mákina Presaun Pozitiva Kontínua Vias Respiratórias (CPAP) hamutuk 20 no Kapus Terapia Oksijéniu balun husi Estadu Unidu Amérika.
Segundu Komandante Operational SIJK, Brigadeiru Jeneral João Miranda "Aluk" Descartes hatete, ekipamentus ne'ebé mak apoiu husi EUA ne'e importante.
"Ekipamentu ne'e mak ventilador portatik atu fasilita ema sira ne'ebé mak iha problema respirasaun, atu uza lalais bainhira hetan atakasaun respiratoriu", dehan nia hafoin sorumutu ho Embaixadór Amerika, Kevin Blackstone iha Sentru Konvensaun Dili (CCD sigla Portugues), kuarta (28/04).
Iha fatin hanesan Embaixadór EUA, Kevin Blackstone hatete, Embaixada EUA fornese ekipamentu médiku hirak ne'e hodi ajuda profisionál Saúde sira iha liña frente fó tratamentu ba Pasiénte COVID-19 sira.
"Estadu Unidu oferese dadaun ekipamentu médiku importante hirak ne’eba governu Timor-Leste hodi ajuda hatán ba COVID-19", dehan Embaixadór.
Sasán hirak ne’e fornese husi Universidade Rhode Island no Guarda Nasionál Rhode Island, halo parte iha Programa Parseria Estaduál (SPP) ne’ebé estabelese entre Rhode Island no Timor-Leste.(*)
