Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo hatete, loron 25 fulan-abril iha izolamentu Vera Cruz iha kazu detetadu na'in-19, iha área obstetrisia na'in-6, medisina interna-10, no pediatria 3.

“Sira na'in 6 iha obstetrisia kategória moderadu hotu, sira-nia kondisun estável”, dehan Rui liuhusi Zoom Conference, domingu (25/04).

Aleinde ne’e, na'in 10 iha medisina interna iha na'in-3 grave, 7 moderadu. Na'in 3 grave ne'e iha 1 mak uza ventiladór maibé rekopera di'ak kompara ho loron hirak liubá. Na'in 2 seluk uza oksijéniu ho mask.

Husi sira na'in-9 iha medisina interna ne’e, na'in-4 mak tama ho ARDS (Acute Respiratoric Distress) ka Sindroma Insufisiénsia Respiratória Aguda, plus iha komorbidade, na'in-5 tama ho ARDS no laiha komorbidade.

“Kazu 3 pediatria, iha 2 grave no 1 moderadu. Na'in-2 grave uza CPAP, no na'in 1 moderadu uza oxijéniu ho mask”, informa Rui. (*)