Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, CIGC-SS), Rui Maria de Araújo hatete, atubele hatene surtu ida ninia evolusaun, nomós aumenta ka diminui, indikador ida ne’ebé matenek-nain epidemiolojia nian uza, mak prevalénsia.
Tanba konvensionalmente prevalénsia sukat persentajen ema ne’ebé detetadu hetan moras ida, iha populasaun nia le’et, iha períodu tempu ne’ebé determinadu.
Nune’e, ekipa konjunta saúde buka determina prevalénsia ema ne’ebé detetadu Covid-19 iha Munisípiu Dili, no hetan rezultadu hanesan entre loron 2 fulan-abril ho loron 15 Abril 2021 (semana 2) iha prevalénsia 3,5% (264 pozitivu husi 7564 pesoál ne’ebé halo teste rastreiu aleatóriu & rastreiu atu halo viajen sai husi serka sanitária Munisípiu Dili).
Ba loron 16 fulan-abril to’o loron 22 Abril 2021 (semana 1) iha prevalénsia 7.3% (425 pozitivu husi 5799 pesoál ne’ebé halo teste rastreiu aleatóriu & rastreiu atu halo viajen sai husi serka sanitária Munisípiu Dili).
“Ajuntamentu ka aglomerasaun ema durante konfinamentu domisiliáriu jerál iha fulan-marsu to’o abril, aglomerasaun ema hafoin inundasaun loron 4 fulan-abril no insidente Vera Cruz loron 12 to’o 15 fulan-abril, halo boot liután risku propagasaun virus iha populasaun nia le’et”, afirma Rui liuhusi Zoom Conference, sábadu (24/04).
Tanba ne’e, aumentu prevalénsia iha semana ida hahú husi loron 16 to’o 22 fulan-abril tinan 2021, kompara ho semana 2 antes hatutu ona katak surtu iha Munisípiu Dili aumentu ba bebeik no hatudu ema barak infetadu.
Haree ba faktu katak maioria husi ema ne’ebé detetadu pozitivu la hatudu sintoma siknifika SARS-CoV-2, da’et maka’as ba mai iha populasaun Dili nia le’et.
“Se ita aplika 7% ba populasaun Dili, siknifika aumenta iha maizoumenus 20 mil pesoál mak infetadu ho virus SARS-COV-2 iha Munisípiu Díli. To’o ohin (24/04) iha Munisípiu Dili rejista de’it 1542 kazu detetadu. Ida ne’e siknifika maioria kazu pozitivu la detetadu”, afirma Rui.(*)