Tempotimor (Dili) - Sentru Integradu Jestaun Krize (SIJK) deteta tan kazu foun hamutuk 69 iha territóriu Timor-Leste, nune'e totál kazu ne'ebé ativu to'o oras ne'e hamutuk 956.
Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, CIGC-SS), Rui Maria de Araújo hatete, kazu detetatu foun hamutuk 69 ne'e, kazu 63 iha kapitál Dili, no 6 iha munisipiu seluk, ne'ebé kompostu husi mane 44, feto 25.
"Husi totál kazu detetadu foun asintomátiku 63 (91,3%), sintomátiku 6. Iha 64 (92,7%) mak deteta tanba halo teste ho razaun atu halo viajen ba Munisípiu hafoin deteta pozitivu", inform Rui liuhusi zoom conference, sábadu (24/04).
Maske nune’e, sira ne’ebé hetan rezultadu teste pozitivu husi grupu ne’e, maioria hela fatin iha duni cluster sira ne’ebé iha kazu detetadu barak iha Munisípiu Dili.
"Kazu rekuperadu ne’ebé ralata ohin, dia 24 de Abril 2021 iha 38 no totál kazu ativu iha 956", dehan nia.
Durante loron rua nia laran, sira ne'ebé halo testes PCR iha Laboratóriu Nasionál Saúde hamutuk 796, ho detalladu hanesan, Vijilánsia sentinela iha 62, Rastreiu ba kontaktu (Contact tracing) hamutuk 15, Rastreiu Aleatoriu (Random Screening) iha 227, viajen sai husi serka sanitária munisipiu Dili 430, viajen internasionál laiha, follow up iha quarentena hamutuk 62, teste follow up ba sira iha fatin izolamentu total 85, no na'in 38 negativu ona, maibé 47 sei nafatin pozitivu.
Tanba ne'e, nia kontinua husu ba públiku tomak atu nafatin kuidadu-an, kumpri mós regra sira husi MS ho OMS hodi evita progasaun surtu covid-19 iha TL.(*)