Koordenadór Forsa Tarrefa iha Sala Situasaun Sentru Integradu Jestaun Krize (SS-SIJK), Rui Maria de Araújo informa, iha sábadu loron 24 fulan Abril tinan 2021 ne'e, iha izolamentu Vera Cruz, deteta tan kazu hamutuk na'in 19, no husi númeru nee, nain 6 iha área obstetrisia, medisina interna na'in 10, no pediatria iha kazu 3.
Maske nunee, nia dehan, pasiente na'in 6 ne'ebé iha obstetrisia, kategoria moderadu hotu, sira nia kondisun estável.
"Sira na'in 10 iha medisina interna, 1 grave, 9 moderadu. Na'in 1 grave uza ventiladór, maibé rekupera di’ak kompara ho loron hirak liu bá", informa Rui Maria de Araújo liuhusi zoom meeting ka video konferensia, sábadu (24/04/2021).
Nia mós hatutan, husi sira na'in 9 seluk iha medisina interna ne’e, na'in 4 maka tama ho ARDS (Acute Respiratoric Distress ka Syndrom - Sindroma Insufisiénsia Respiratória Aguda-SIRA) plus iha comorbidade, na'in 5 tama ho ARDS no sira la iha comorbidade.
"Kazu 3 pediatria, 1 moderadu, na'in 2 gráve. Na'in 1 gráve uza CPAP, no 2 moderadu uza oxijéniu ho kanula", hateten Rui.(*)