Tuir informasaun ne’ebé www.tempotimor.com asesu husi autoridade katak, matebian sei lori ba uma hodi halo prosesu tuir kultura hafoin bele ba halot iha semitériu jerál Bekussi, maibé tuir nafatin protokolu ne’ebé prepara ona Organizasaun Mundial Saúde (OMS) no Ministériu Saúde.

Vítima OM nia alin ikun, Manuel Joăo Mendonça dehan, molok ne'e vítima OM moras iis boot no tensaun iha nia uma durante semana rua, hafoin ida ne'e, família sira lori nia ba Hospital Nasional Guido Valadáres (HNGV) hodi halo tratamentu.

Maibé, bainhira to'o iha Ospitál, médiku sira halo teste swab ba matebian, no rezultadu hatudu pozitivu Covid-19.

Hafoin deteta pozitivu, família sira mós koopera hodi lori ba izolamentu Verra Cruz, maibé infelizmente la salva iha loron kinta (22/04), vítima hakotu iis.

"Nia moras laran, sira tau fali ba covid, mais ami mós koopera ho governu dehan lori mai. Iha Ospital, sira dehan moras oioin de'it, moras kona-ba pulmaun foer, tensaun ho iis boot. Iis boot ami ba swab, depois dehan covdi19”, dehan alin-ikun matebian ne’e iha izolamentu Verra Cruz-Kaikoli, kinta (22/04).

Iha fatin hanesan, oan mane husi matebian, Joăo Mendonça dehan, nia la konkorda ho desizaun médiku nian katak, nia inan mate, la'os tanba moras covid-19.

"Iha uma mak ami lori ba Hospital Nacional Guido Valadares. Ba Swab iis boot, nia tensaun no nia pulmaun. Ba iha ne'ebé sira dehan kona covid, ne'e mak sira muda ferik sees tiha kedan, maibé ami la aseita”, dehan nia.

Entrerantu, bazeia ba informasaun neebé www.tempotimor.com asesu husi família sira katak, oras ne'e Líder Partidu CNRT, Kay Rala Xanana tula ona kaixaun mai iha izolamentu Verra Cruz nian hodi lori fila matebian ba uma.

Tuir planu, família sei lori fila matebian ba nia uma iha Aldeia Teka Hudilaran, Suku Lahane Orientál, no sei hakoi iha Semitériu Bekussi.(*)