Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste (CIGC-SS), Rui Maria de Araújo, dadus jerál iha Timor-Leste ho totál kazu konfirmadu kumulativu (sura husi tinan 2020) hamutuk 1193.
“Kazu rekuperadu ne’ebé ralata iha dia 16 de Abril 2021 hanutuk 60. Total kazu ativu ohin (sesta), dia 16 de Abril 2021 hamutuk 560”, dehan Rui liuhusi Zoom Konferensia, sesta (16/04).
Nune’e kazu detetatu foun ne’ebé relata iha loron 16 fulan-abril Tinan 2021 hamutuk 55 (iha Dili 43, iha Munisípiu seluk 12). Husi totál kazu detetadu foun mane 29, feto 26, iha sintmátiku 1, asintomátiku 54.
“Husi totál kazu detetadu foun ohin (sesta), 39 (70%) mak deteta tanba halo teste ho razaun atu halo viajen ba Munisípiu hafoin deteta pozitivu”, afirma Rui.
Haree ba evolusaun surtu Covid-19 iha Munisípiu Dili, iha loron 16 fulan-abril deteta kazu foun 43. Nune’e, kazu detetadu ka pozitivu iha Munisípiu Dili, sura kumulativamente husi tinan 2020 to’o loron 16 fulan-abril 2021, hamutuk hotu 1006.
Husi ne’e, sei la relata dadus tuir cluster, maibé sei temi de’it fatin ne’ebé kontinua deteta kazu foun iha Munisípiu Dili nia laran.
“Husi horiseik (kinta) mai ohin (seste) fatin sira ne’ebé deteta kazu foun hanesan Komoro 12, Santa Cruz 9, CCD 6, Fatuhada 6, Kaikoli, Bekora, Laboratóriu Nasional Saúde 2, Vila-verde, Mascarenhas, Madohi 1. Iha Munisípiu Dili, hamutuk hotu, sei nafatin iha cluster 23”, dehan nia.
Maibé, evolusaun iha Munisípiu Aileu, husi horiseik (15/04) mai ohin(16/04), deteta tan kazu foun 1. No evolusaun iha Munisípiu Manufahi deteta tan kazu foun 11. No iha Munisípiu sira seluk ho RAEOA, la deteta kazu foun.
Durante loron rua (15-16/05) hamutuk hotu Laboratóriu Nasionál Saúde halo 1139 teste PCR, hanesan, Vijilánsia sentinela 234, Rastreiu ba kontaktu (Contact tracing) 142, Rastreiu Aleatoriu (Random Screening) 159, Viajen sai husi serka sanitária Munisípiu Dili 730, Viajen internasionál 20, Follow up iha kuarentena 34.
Totál pedidu autorizasaun esepsionál atu sai husi serka sanitária iha Munisípiu Dili, iha loron 14 & 15 fulan-abril, hamutuk hotu 325.
Sekretariadu CIGC responde hotu kedan, maibé 15 pedidu la prienxe kritériu tuir Rezolusaun Governu kona-ba Serka Sanitária iha Munisípiu Dili.(*)